姜皓文（黑仔）在娛樂圈打滾多年，其實入行之前他在酒樓賣過點心、做過裝修工人、甚至表演雜技，後來才報名參加「電視先生選舉」而入行。黑仔父母緣淺，出世之後都沒有見過生父，媽媽後來跟繼父都相繼離世，黑仔只好被送往寄宿學校。他表示：「我童年的確幾複雜，我成日都同人講我戲唔好、唔靚仔，但我經歷多，童年所經歷嘅，如果有合適嘅感受都會放入演戲入面。我媽咪過身，爸爸一早唔知去邊，養父都走埋，現時只剩太太同幾個細佬妹。」
黑仔的悲慘童年令他加添好多人生經歷，對演戲有一定的幫忙。(《晴報》圖片)
黑仔同太太殷寧（前名：金慧英）在亞視年代認識，1999年結婚，至今已經20年，黑仔童年時的不堪，會否影響到他跟太太殷寧生育的計畫呢？他說：「生小朋友這件事是階段性的，要做就自然做，過咗就算，冇又冇乜相干，我又冇老人家催生壓力，兄弟姊妹有小朋友，我哋當一齊養囉。如果意外有就梗係要，順其自然，冇刻意話唔要。」黑仔和太太飼養6隻狗1隻貓，一家九口非常熱鬧，黑仔自認是「怪獸家長」經常縱壞小朋友，當談到孻女NaNa時，更一臉慈父樣，非常溫馨。「老婆負責教訓佢哋，我就好縱班小朋友，所以有咩事，小朋友都會嚟晒我度，而我的確係有偏心孻女NaNa，佢由出世嬰兒期開始都一直好黐我，如果我唔喺度，由老婆接手，佢會開口吠甚至咬我老婆，NaNa唔想任何人接近我，佢好保護我，我如果有幾日唔喺屋企，佢就會坐埋一邊，當我一返，佢就好活躍。老婆梗係唔會呷醋，前世情人嘛，不過NaNa會呷我老婆醋，佢覺得爸爸係我呀，唔准搞佢！」NaNa在家中擁有自己的首飾箱，得閒就會揀飾物扮靚，十足小公主一樣。
黑仔同太太殷寧養6狗1貓，夠晒熱鬧。(圖片：受訪者提供)
白色呢隻就係黑仔口中的孻女NaNa，絕對係姜家心肝椗。（圖片：姜皓文IG）
黑仔對貴婦狗情有鍾獨，剛好6隻狗都是貴婦。（圖片：姜皓文IG）
太太殷寧參加亞洲小姐競選入行，曾經拍過電視劇及擔任《今日睇真D》記者，婚後就甚少幕前的演出，原來同黑仔有關，黑仔說：「老婆唔做幕前係好順其自然嘅事，佢之前都有做網台主持，不過坦白講，我唔太鍾意佢出嚟拍嘢，因為拍嘢點都會受氣，我太熟悉老婆個性，唔想佢添不必要嘅麻煩，既然我仲處理到，就工作賺錢等我做。佢好好，佢同我講只要覺得有合適嘅演出就放心去做，『屋企所有嘢唔使擔心，唔係等你開飯！』，聽完呢句說話真係好感動，佢好諒解我，放心畀我出去跑，我好慶幸有呢位老婆，冇佢我唔知飄咗去邊度。」有年太太的生日，黑仔為她買了馬來西亞檳城的一個房子作為禮物，感激她多年來的支持和陪伴，認真甜蜜。
跟太太殷寧牽手20年，恩愛非常。（圖片：姜皓文IG）
黑仔只要放假，就會陪太太四圍去。（圖片：姜皓文IG）
黑仔事業上的成功，有賴太太殷寧在背後默默支持。（圖片：姜皓文IG）
結婚20周年，有如此的賢內助，讓黑仔能夠放心在演藝工作上面奔馳，黑仔對太太的那份感激，不只會藏在心底，他會大大聲向老婆講「我愛你」，而黑仔每逢重要的場合，如頒獎禮或者首映等等，手臂挽著的一定是太太殷寧的手，兩公婆就決定這樣走到白頭，黑仔說：「兩公婆相處無論點都好，千祈唔好講夭心夭肺嘅說話，有底線嘅，我哋相處咁耐，遷就到就盡量遷就，一人少句。不過，我覺得唔鬧交係唔正常，最重要鬧出嚟之後識得收口。我都係引導到我老婆識講粗口，依家鬧親交，佢一講粗口，我就即刻收嗲，因為佢講得粗口代表佢已經好嬲喇！男人專一唔難，人大咗就識得珍惜，初初結婚都唔太明白呀，不過人愈大，兩夫妻感情就愈珍貴，識得珍惜身邊所有人，人都感性咗好多。依家更加會特別專一，我都冇時間出去搞，咪鬼浪費時間同金錢。」
黑仔直言年紀漸長，愈懂得珍惜身邊的人。（圖片：姜皓文IG）
結婚20年，黑仔和太太殷寧鬧交都鬧出夫妻相處之道。（圖片：姜皓文IG）