現年43嘅佘詩曼演技岀色，呢年憑內地劇《延禧攻略》「嫻妃」一角爆紅，喺大陸超受歡迎，工作邀約一個接一個，而佢一於專注內地發展，北上密密賺人仔。不過就算工作幾忙，身為孝順女嘅阿佘都無忘記屋企人，佢岀名錫媽咪，因為怕媽咪辛苦，唔捨得佢成日坐飛機去大陸探班，所以阿佘一得閒就抽空飛返香港陪佢，又努力賺錢畀最好嘅物質媽咪享福，真係好抵讚㗎！
（佘詩曼Facebook圖片）
阿佘咁錫媽咪都係有原因，事關佘媽單親養大三兄妹，一個女人仔，真係好唔容易。喺阿佘年僅5歲嘅時候，爸爸因車禍而過身，痛失丈夫，佘媽都無選擇改嫁，搵另一個男人依靠，而係獨力撫養仔女成才，咁多年全靠佘媽母兼父職，含辛茹苦搵錢養家，佢又供阿佘到瑞士留學讀酒店管理課程，希望畀最好嘅學習機會佢。
（佘詩曼Facebook圖片）
幸好阿佘自小亦好懂事，除咗學業唔洗媽咪擔心外，性格都好體貼，當時爸爸過世後，媽咪一直喊，阿佘年齡仲細唔知發生咩事，單純唔想佢唔開心，仲話：「媽咪你係咪驚無人陪你訓呀？」為了讓媽媽唔好感覺孤單，佢那時就開始陪媽媽瞓覺，直至佢十幾歲到瑞士留學。阿佘知道屋企唔係有錢，兒時好想戲院睇電影，但考慮到屋企經濟，就強忍住內心渴望，主動提議到公園玩就夠，真係好乖女。
（阿佘陪媽咪慶祝生日,佘詩曼Facebook圖片）
阿佘為咗報答媽咪養育之恩，現在即使工作再忙都會陪媽咪食飯、慶祝生日，又不時喺社交網絡曬同媽咪嘅合照，仲會sweet到爆咁示愛媽咪：「如果要喺地球出世一千次，我希望每一次都係媽咪做我媽媽！」、「我相信一見鍾情！因為從我出生睜開眼睛嘅一刻，我就愛上我媽媽了！」、「媽咪係我最大嘅快樂」佘詩曼亦曾於節目大讚媽媽教識佢好多做人道理，影響佢好深，「媽咪教我要對自己嘅承諾負責，答應人嘅事一定要做到，因為係個人品格嘅問題。」
（《説岀你的世界》影片截圖）
（《説岀你的世界》影片截圖）
佘媽捱咗咁多年，終於養大三個仔女，現時已經退休，好好享福。佘詩曼為咗讓媽咪安享晚年，開心過日子，曾喺母親節送樓送車畀佢做禮物，認真孝順！
（阿佘同媽咪慶祝母親節,佘詩曼Facebook圖片）