謝霆鋒的王牌節目《鋒味》又嚟喇！昨日於北京舉行記者會，更請來佘詩曼做嘉賓，照劇情發展，應該係「哇！呢樣好味，哇！個樣又好好味！」不過最終就忽然變成爆料大會，事關阿佘突然話霆鋒之前係一個特別自閉嘅人，唔多識同人溝通，而霆鋒亦承認自己以前有好多問題：「以前我不喜歡與人交流，就連和父母都不怎麼說話，但自從拍《鋒味》後，慢慢開始懂得打開心扉，如果不是因為《鋒味》，我可能就做了一些看不開的事！」
霆鋒嘅差啲做傻事言論一出，即時變成網上熱話，事關唔少網民都估緊到底係邊個搞到霆鋒咁睇唔開，有人更認為可能係當年佢同張栢芝離婚風波嘅後遺症，「當年的風波如此轟動，帶來這麼多是非，變成自閉很正常。」、「身為男人有很多事都不能說，屈在肚裡，不生病才怪。」雖然霆鋒就話因為美食治癒了他的心靈，但不少網民都話真正的靈丹妙藥是王菲才真，「自從與王菲拍拖後，霆鋒的笑容變多了，希望他們早日結婚。」不過亦有網民贈興話其實最想知霆鋒會做乜嘢傻事，唔通係爆大鑊？
網上圖片
網上圖片
網上圖片