KAWS掀打卡熱潮 市民大讚好睇兼有意義

黛安近日同好多香港人一樣都好忙，因為美國藝術家Kaws筆下嘅37米大型臥姿藝術裝置COMPANION，上周五（22日）起終於嚟咗香港展出喇！黛安噚日都同姊妹去咗Selfie，見現場市民都大讚COMPANION造型夠特別，甚至比幾年前嘅「小黃鴨」更靚咁話！

黛安都有出席上周五（22日）嘅開幕禮，仲同偶像、今次活動嘅主辦及策展單位AllRightsReserved創作總監、策展人林樹鑫（SK Lam）傾咗幾句，恭喜佢再次成功帶動全城熱話！同場仲有旅發局好姊妹Cynthia、即將卸任嘅主席林建岳同總幹事劉鎮漢，以及亞洲萬里通行政總裁施愷民等捧場，認真星光熠熠。

噚日假期吸引唔少人去「朝聖」。25歲嘅甄先生由17歲起已好鍾意KAWS作品，因顏色夠沉實，比其他色彩斑斕嘅公仔更特別、更順眼，仲優勝過「黃鴨」！但比起臥姿，佢就更鍾意台灣展出時嘅坐姿，睇落更宏偉而且影相都方便啲。來自湖南嘅熊先生同女友專誠嚟打卡，佢大讚KAWS COMPANION夠潮，比起純粹賣得意嘅「黃鴨」更好睇，表達嘅意義更深遠。

由於今次作品係喺近添馬對開海面，有人提議坐摩天輪升上半空，雖然有市民就話其實視野唔算好，但都不失為一個居高臨下嘅好選擇。

Tag #AsiaMiles 免費印相兼玩扭蛋

黛安知道亞洲萬里通（Asia Miles）係今次活動贊助商，適逢佢哋今年20周年，專門搞咗個即場照片打印同扭蛋嘅活動，22至24號合共吸引2,500人參與。

黛安仲遇到剛由太古轉職至Asia Miles嘅姊妹方子敏（Loretta），佢話市民可將自己同KAWS嘅合照放上社交網，並Tag #AsiaMiles，就可免費打印張相出嚟兼參與扭蛋活動，有機會獲KAWS主題獨家環保袋等禮物。