90年代處境劇《卡拉屋企》昨晚開始在凌晨時分於無綫重播，不少夜貓子為了集體回憶，都努力「捱眼瞓」捧場，可見得《卡拉屋企》當年幾受歡迎。昨晚第一集《家人有約》主要都是以白頭佬(楚原飾)同肥媽(盧宛茵飾)一家人生活為主線，當然少不了泰臣（吳鎮宇飾）、肥舅父（秦煌飾）同Popeye，再次睇到間屋個設計，即時好似返到90年代一樣，大家有沒有留意到好多當時時令的產物，到現時已經消失得無影無蹤呢？
1. 打字機
李婉華在警局負責處理文件，見到個打字機，可能好多千禧後會問：「咩嚟呀？」現時電腦普及化，打字機已經成為古董了。（圖片：《卡拉屋企》電視截圖)
２. 大牛龜電視
嘩，黑白電視？非也非也，只是劇情講到白頭佬（楚原飾）正在收睇粵語長片，當時已經有彩色電視同節目，但電視機比現今的就厚好多，叫膽機電視，家家戶戶都會放一些小擺設在上面，如今電視已經發展到好薄、超薄、甚至360度弧形都有，仲點會放到擺設？大家如果當年有記憶的話，電視好靠大廈天線接收，萬一訊號收得不好，好多人都會拍一拍電視頂，就會改善電視雪花的問題，不過如今好多人都陸續轉睇數碼電視，大牛龜的電視機早被淘汰。（圖片：《卡拉屋企》電視截圖)
3. 天線電話
一講電話就一手拉起長長的天線，方便接收訊號，如今？手提電話既方便又多通話量，好多人屋企已經沒有再安裝家居電話。（圖片：《卡拉屋企》電視截圖)
4.GAMEBOY
發記（鄭敬基飾）是當時的大學生，追求最新潮的玩物，而他手上的正正是當時最HIT的手提遊戲機GAMEBOY，1989年開始發售，直至2003年正式停產，不過Game Boy合計已賣出1億1869萬部，認真威水！你當年有無？最鍾意玩「俄羅斯方塊」定「孖寶兄弟」？（圖片：《卡拉屋企》電視截圖)
5. 遊戲帶
同樣是遊戲機同遊戲帶，當時任天堂的紅白機，要入遊戲帶去轉換遊戲，一盒二盒放在家裡，卡槽又要好小心處理，萬一入塵又可能會整壞，不過現在大家都是用手機APP打機，或者玩網絡遊戲，遊戲帶....咩嚟呀？（圖片：《卡拉屋企》電視截圖)
6. CALL機 (又名傳呼機)
做女警的黃蒂（李婉華飾）和黃菲（黎海珊飾）一人腰間都有一部CALL 機，當時手機電話未流行，大家都用傳呼機聯繫，不過她們手上這個尺寸的CALL機屬於中期產品，最早期的CALL機只有數字，要打去CALL台問訊息，後來演變成CALL機可以出字，大概短短的一句就睇到對方的訊息，而最後期的CALL機已經發展到超細型，細得跟火柴盒一樣。所以，以前約朋友都唔可以話：「去到CALL你！」一定要定點定時出現，事關沒手提電話，就算用電話亭打電話都是找不到對方。（圖片：《卡拉屋企》電視截圖)