認識樂齡科技 改善長者生活

政府之前推出10億元「樂齡及康復創科應用基金」，為咗令樂齡科技更多人認識，物流及供應鏈多元技術研發中心（LSCM），噚日起喺奧海城舉行一連4日嘅「智叻科技樂在『耆』中」展覽！

聽公關姊妹講，今次展覽除展出各項本地研發嘅技術同產品，包括長者輔助移動工具、自動輪椅跟隨機械人、智能服務機械人等外，同時亦展示其他曾經喺國際發明展中獲獎嘅技術，例如無綫射頻識別視障人士手杖系統、適用於長者嘅紅外綫熱能感應警報系統等。

要講到最特別嘅，黛安覺得係由佛教黃允畋中學同學發明嘅「iWheel」輪椅動力裝置，曾經喺多次比賽中獲獎！原來操作好簡單，可將裝置放喺手動輪椅座位下方，長者可利用扶手上嘅按鈕操控輪椅，如果要喺交通工具上落，亦只需數10秒就完成拆卸，功能簡直可媲美一台過萬蚊嘅電動輪椅。聽講已申請咗專利，搵緊廠家合作生產，相信好快就可以買到啦！