【專訪】難敵打擊頹廢2年欲輕生 視障跑手逆轉人生：路係人行出嚟

人生是一場又一場的挑戰，如果不去嘗試，就永遠無法得知前面的風景。本港51歲視障跑手梁小偉（Gary）經歷過人生高山低谷，10年前因失明、失業、失戀3重打擊，足足頹廢了超過2年時間，暴肥至190磅；自暴自棄的他足不出戶、終日醉酒，期間更一度企跳尋死。所幸他後來想通，決定聽從視障朋友介紹，透過跑步來減肥。多年來他試過環台跑，亦到過南北極跑馬拉松，更成為了長跑教練，本月尾又將出發到北京再跑回香港。他接受《晴報》訪問時回顧過去，坦言對家人感激又抱歉，「你哋放心，我會努力，盡力做好自己！」

{{hket:inline-image name="gary0603201913.jpg"}}{{/hket:inline-image}}

Gary自小患視網膜色素病變，在晚上及暗的地方看不到東西。2000年起，其視力慢慢收窄；雖然知道自己會隨時看不到，但當2009年完全失明時，仍難以接受，「初頭覺得世界冧咗，突然逆轉」。失明後，他失去工作，拍拖多年的女友亦提出分手。大受打擊下他終日醉酒，暴肥至190磅，更一度站在窗邊企圖尋死。

由於他在家中長開收音機，每次醉後醒來聽到交通意外等各種新聞，便開始慢慢想通，「好多人想留低但又離開咗，我雖然冇咗視力，但仍可自主身體，如果我繼續咁樣對佢哋嚟講係一個笑話。自殺並唔係正確做人嘅做法，家人會好傷心，如果個個遇到事都跳落去，冇人會解決問題，所以我嘗試自救。」而且，他自問不是一個懶惰的人，「唔甘心就咁輸咗」，終決定重新振作。

{{hket:inline-image name="gary0603201912.JPG"}}{{/hket:inline-image}}

頹廢2年重拾鬥志，除了學習適應視障生活外，他亦聽從其他視障朋友介紹，透過跑步來減肥，最終花1年多時間減去60多磅。約7年前，Gary在北京參加人生首個全馬比賽，由天安門起步，成功用3小時46分跑畢全程。搞笑的是，由於當時視障長跑運動在當地仍未普及，有當地人看到他跟男領跑員用一條繩牽着跑，還以為是情侶參賽，「拍我哋膊頭話『好恩愛』，嗰時真係滴晒汗，好無奈咁解釋」。

{{hket:inline-image name="gary060320191.JPG"}}{{/hket:inline-image}}

{{hket:inline-image name="gary060320194.JPG"}}{{/hket:inline-image}}

多年來，他又前往台灣環島跑，花了19天完成1080公里。就連南極、北極，他也曾踏足並跑過步，「北極辛苦過南極，首先溫度低過南極，一嚟就零下30幾度。由於喺冰上跑，我同領跑員不斷互相拉跌大家，跌跌踫踫，結果用咗10個半鐘先完成42.195公里，係有生以嚟最慢嘅一次。」雖然在南北極之旅，途中想過放棄，但Gary笑言不敢，一定要「頂硬上」，「同晒鄉親父老講自己去跑，又有人跟住去、又有贊助、又有support team（後援小組），同埋真係好貴，人生冇第2次機會再去，輸唔起，所以一定要堅持完成！」

{{hket:inline-image name="gary060320198.JPG"}}{{/hket:inline-image}}

{{hket:inline-image name="gary060320195.JPG"}}{{/hket:inline-image}}

為了挑戰自己，並為本港慈善機構「母親的決擇」籌款，Gary決定於本月25日出發往北京，再穿州過省跑回香港，「如果行路都可以行到去廣州，咁跑咪好快到？咁跑去北京，似乎都可行喎！不過跑返屋企動力會大啲，所以決定由北京跑返香港，全程2500公里。挑戰自己同時又可以籌款，覺得好有意義。」由於全程35日中沒有休息日子，部分更是新領跑員，體能上未必吃得消，故35人會分成7組，每5日由一組5人輪流領跑。現時Gary正與領跑員培養默契、積極備戰，「盡量放鬆心情，唔諗太多。而家會小心啲唔好受傷，傷咗跑唔成就好可惜。最重要係安全完成。」

{{hket:inline-image name="gary060320199.JPG"}}{{/hket:inline-image}}

Gary一路走來不易，但憑著堅毅精神終成功逆轉人生，現時更成為長跑教練，學員全部都是視力正常。他最感激的，是家人無論在他失意之時、又或在現時，都十分支持他，「自暴自棄嗰時成日搵家人出氣，鬧媽媽同2個細佬。雖然成日埋怨佢哋，但佢哋仍然包容我、體諒我、幫助我，所以而家成日同佢哋講番對唔住。」

{{hket:inline-image name="gary0603201911.JPG"}}{{/hket:inline-image}}

他又寄語同路人，千萬不要放棄自己，「開心又係咁過，唔開心又係咁過，用另一個角度去諗嘢。路係人行出嚟嘅，個天拎走你一啲嘢，一定會留返一扇窗或一道門俾你，但都要靠你自己去搵。唔好睇小自己，肯去試就有成功嘅機會，唔試就一定冇你份。就算已經有目標或者挑戰中，都要學識堅持。仲有，要活在當下，珍惜時間、珍惜眼前人，做好自己，到要走嘅時候無悔！」