李嘉誠基金會 攜手浙滬大學推醫學健康研究

長和系前主席李嘉誠退下前綫工作後，專注名下基金會運作，黛安知道，最近基金會又有新投資，就係斥資200萬美元（約1,560萬港元），喺浙滬地區建立研究基地，推動「呼吸活檢癌症」及「無抗養殖」，希望改善人類健康同生活質素。

聽公關姊妹講，基金會協調英國創新醫療公司Owlstone同上海交通大學醫院附屬仁濟醫院簽訂合作備忘錄，喺上海進行呼吸活檢肺癌臨床測試，並增設實驗室；另協調美國生物科技公司Evolve Biosystems與浙江大學簽署合作備忘錄，合作進行無抗生素生態養殖研究，為小豬進行「以益生菌代替抗生素」測試。

黛安相信好多姊妹都未必知道「呼吸活檢」係咩，其實，內地癌症發病率日益增加，每4宗死亡個案就有1宗死於癌症，而頭號殺手就係肺癌；而「呼吸活檢」採樣可以分析人體代謝過程的產物「揮發性有機化合物（VOCs）」，透過了解VOCs模式就可以高效而無創檢測癌症。Owlstone公司就期望，技術可提高患者存活率，降低醫療成本。

另外，相信好多姊妹都聽過濫用抗生素，抗藥性問題可能會令日後「無藥可用」。內地養豬業為防止小豬腹瀉同胃腸道感染，亦有濫用養殖抗生素問題。Evolve Biosystems公司就研究，以天然腸道益生菌恢復小豬啲腸道微生物群生態平衡，等啲豬仔哺乳期唔需要抗生素亦可健康成長。

Evolve Biosystems更期望，相關研究日後可應用於嬰兒產品，並改善中國初生嬰兒健康。兩個項目都咁有意義，黛安衷心祝佢哋成功。