青協FLL創意機械人大賽 600中小學生用STEM解難

小朋友嘅創造力量同幻想，真係唔可以睇小！黛安早幾日去咗青協主辦嘅「2018／19香港FLL創意機械人大賽」總決賽，觀摩近600位中、小學生，仲有社會服務機構嘅年輕人隊伍比賽嘅情況，同場仲遇到天文台台長岑智明，佢話學生可透過研究各個行星嘅特徵，了解氣候點樣影響地球嘅環境同生態。

睇住一班學生用編寫電腦程式驅動機械人嚟解決任務，真係覺得佢哋好叻，最後迦密中學蟬聯中學組全場總冠軍，佢哋嘅作品好窩心，就係構思咗一個創新裝置，連接太空人同埋佢嘅屋企人，透過裝置互相接觸到對方嘅手同埋感應體溫，一解相思之愁。小學組嘅全場總冠軍就由大埔舊墟公立學校（寶湖道）奪得。青協總幹事何永昌話，想學生透過比賽，用行動培養對機械工程同埋科研興趣，激發創新思維。