Clement海洋公園潛水示愛 鄧達智情人節收浪漫驚喜

今日係正月十五元宵節，街上充滿住甜蜜蜜嘅氣氛，令黛安諗番起上星期西方情人節喺海洋公園發生嘅一件浪漫事！講緊嘅係著名時裝設計師鄧達智（William）嘅partner陳梓欣醫生（Clement），當日喺園內嘅海龍王餐廳，特別潛咗落餐廳個大魚缸中，兼拉起「I Love You」橫額當眾向William驚喜示愛，勁浪漫啊！

黛安當日應海洋公園姊妹Una邀請出席一個神秘嘅情人節派對，話有驚喜。當晚園內簡直溫馨滿載、愛意盈盈！事緣之前喺一個飯局度，Clement話佢曾經喺海洋公園水上樂園做過兼職救生員，無論游水定潛水都有番咁上下功力，所以幾個姊妹就決定打算一齊喺情人節當日，為佢嘅另一半William，炮製一個大驚喜！

就喺情人節派對當日，佢化身成準備餵魚嘅潛水員，潛入海龍王餐廳個大魚缸，再慢慢靠近玻璃一面，兼拉開手上一個寫上「William I Love You」嘅捲軸，搞到William鬼咁感動，愛意滿到隔住塊玻璃都擋唔住！

其實除咗佢哋開心之餘，唔少網友都被閃光彈擊中，留言話「Sweet爆」，仲笑言Clement呢招係「做壞市」，真的哭笑不得！

當晚仲有唔少名人見證這浪漫sweet爆的一刻，好似有《晴報》社長麥華章、《晴報》專欄作家查小欣、方健儀、胡孟青、仲有才子陶傑等，齊齊帶埋另一半出席，最後每位女士都收到玫瑰花，相當浪漫，黛安睇到都好開心。今日係中國情人節，黛安都祝願天下有情人終成眷屬。