英國豪華郵輪瑪麗皇后號（Queen Mary）被《時代雜誌》評選為「全球10個最猛鬼地方」嘅第6位，因為佢有間B340號客房成日鬧鬼，甚至有個男人曾經喺房度暴斃，於是間秀就被封印近30年......事源1942年，瑪麗皇后號徵召成軍艦，如常咁喺大海上航行，點知一次意外將一艘護衛艦撞沉，奪走咗239條人命。喺1967年退役之前，船上已經有鬧鬼傳聞。之後瑪麗皇后號改裝為酒店，停喺美國加州長灘，但入住嘅乘客都異口同聲咁話好猛鬼，有人目擊到有半透門嘅白衫女子喺頭等艙出沒，有人聽到船上死去小朋友嘅聲音。而當中最邪就係B340號客房，例如燈會自己開關，瞓覺嗰陣張床被掀起，見到床邊有黑影，連船長入房都會全身不適而唔敢住。最後酒店決定將B340上鎖，封印長達30年。
如今瑪麗皇后號嘅B340終於對外開放，雖然每晚價格要高達499美元，不過身為鬼王嘅潘紹聰決定親身去實地睇吓。入到船裡面，由瑪麗皇后號嘅大副Chris Perley負責帶路，逐個猛鬼傳聞睇勻。
第一站：猛鬼游泳池。傳聞二戰結束後，有個5歲小朋友Jackie喺頭等艙嘅泳池溺斃，當遊客參觀嗰陣，會細細聲喺耳邊講：「同我玩吖！」，仲會見到水花同濕水腳印。鬼王第一時間召喚：「Jackie」，嚇到大副叫佢唔好亂咁講嘢。
第二站：夾死人嘅大鐵門。1966年7月10號，因為13嘅水閘冇徹底咁閂埋，船長叫船員去檢查，當佢哋去到嗰陣有個18歲水手被閘意外夾死咗，自始就成日有男性靈體拍門。
第三站：升降機鬼手印。唔知點解瑪麗皇后號嘅升降機門同牆身成日再手指模，仲不時有靈體現身。有人曾經睇住門嘅倒影，見到有人企喺佢身後，但擰轉就一個人影都唔見...
第四站終於到去B430。位於船艙第3層，係瑪麗皇后號上唯一一間沒有門牌號碼嘅房間，裡面嘅浴室牆上仲附上銘文，傳聞只要對住鏡子朗誦3次，就可以召喚「血腥瑪麗」。不過行到去先知原來間房依家已經被水淹到濕晒，唔可以入住。雖然鬼王不幸住唔到呢間房，但佢竟然聽到裡面有人講嘢！？
為咗睇吓船上面有冇靈體，鬼王打電話俾電視台主持兼高靈人士詹朗林做天眼感應...去到大堂樓梯位已經有好多氣場聚集，行到B340畫面仲變得模糊，再行就會因為氣場太大而斷線，佢話佢感應到房裡面嘅人唔似官方所講咁係心臟病發...反而應該係自殺！如果大家想知多啲，不妨親自睇埋條片，甚至...自己去探靈！