為養家錯過子女成長 阿Bob：呢個世界公平咩

繼之前戲稱為養家搞到要去捐精後，阿Bob林盛斌尋日又於IG吐苦水，事緣林太帶埋四個仔女去旅行，但阿Bob因為工作在身未能同行，睇見佢哋玩得咁開心，阿Bob都好妒忌：「佢哋好Happy咁去滑雪浸溫泉食拉麵，我就好Lonely咁喺屋企玩手指食杯麵！呢個世界公平咩。」

留言一出，有網民笑佢呢個世界從來都係唔公平，但亦有網民大讚佢咁先證明自己係稱職老公同老豆，不過一講到「稱職」二字，阿Bob似乎仲感觸：「我係一個唔稱職嘅老竇，始終喺我呢個近40歲嘅年紀，很多時喺工作上身不由己，我都好想喺重要日子陪小朋友，但有時未必做到。」

對於錯過了很多子女成長的時光，阿Bob更充滿遺憾：「因為工作關係，好多時屋企幾個小朋友嘅第一次乜乜乜我都去唔到、睇唔到、聽唔到，例如：大女霏霏第一次幼稚園畢業禮、入學禮、二女熹熹第一次踩單車、第一次學識溜冰，三女機機第一次學識爬、學識行，細佬JJ第一次學識轉身等等。」成日聽人講母愛偉大，阿Bob就話畀大家聽，其實父愛都不遑多讓架！

{{hket:inline-image name="RR.jpg"}}{{/hket:inline-image}}

林盛斌IG

{{hket:inline-image name="d.jpg"}}{{/hket:inline-image}}

林盛斌IG