60歲何家勁男神回歸 分享不老秘密

一提起靚仔又有型嘅展昭，相信唔少人第一時間會諗起何家勁，當年《包青天》熱潮勁到連無綫亞視都爭住播，鬧出雙胞胎風波，同時亦令何家勁嘅事業登上巔峰！可惜其後佢轉戰內地發展，更逐步淡出娛圈進軍商界，創立飲食品牌勁家莊，有指如今勁哥身家已億億聲不知幾富貴。

而最近何家勁難得返港過新年，仲同李克勤、譚詠麟等一班明星足球隊踢波，只見何家勁雖然已經60歲，但依然keep得非常之好，臉上唔止一條明顯皺紋都無，就連身形亦一樣fit爆，擁有大大隻麒麟臂，真係點睇都唔似60歲！不過勁哥似乎唔多適應香港嘅炎熱天氣，仲要著背心短褲出街，兼忍唔住於微博吐苦水：「熱成這樣！這就（是）香港過年的衣服了！！」

大談不老心得

不過講到尾，相信大家最關心都係點解勁哥可以keep得咁好，原來一切都係從飲食著手：「每朝食早餐前，我一定會空肚飲一杯全穀物，因為佢唔止飽肚，令你之後食少啲，佢啲纖維仲好勁，飲完無耐你就會去廁所，依家我嘅飲食都係以全穀物同生果為主，其他就無戒口，想食乜就食乜，不過記住晚餐就要食得清淡啲。」除了靠飲食，勁哥還有兩大年輕法寶：「最緊要係保持童心，日日都要心情愉快，另一樣就係一定要做運動。」大家學唔學到嘢先？

{{hket:inline-image name="UY.jpg"}}{{/hket:inline-image}}

何家勁微博

{{hket:inline-image name="F.jpg"}}{{/hket:inline-image}}

李克勤微博

{{hket:inline-image name="RW.jpg"}}{{/hket:inline-image}}

網上圖片