國際燈光藝術展 打造「愛與浪漫」打卡熱點

好快就到情人節，黛安最鍾意發掘有特色嘅景點同honey打卡放閃，其中一個心水地方就係中環海濱！事關旅發局而家喺中環海濱搞緊「國際燈光藝術展」，一共展出15件展品，其中7件仲係用「愛與浪漫」做主題！

黛安趁住放假去睇過呢啲靚靚展品，發現除咗本地藝術家外，有3件係由海外藝術家創作，包括嚟自匈牙利嘅巨型鬱金香燈光藝術裝置，色彩繽紛嘅鬱金香喺夜晚特別一枝獨秀！仲有嚟自日本嘅魔法光影鳥群藝術作品，只要愈多人行入去，就愈多作品發光！

至於本地藝術家作品方面，創意度同美觀度一啲都唔輸蝕，其中作品「愛的幾何」就用咗教堂嘅彩繪玻璃做設計概念，用幾何圖形拼砌出唔同嘅心形圖案，好似置身教堂行禮一樣；另一個作品「從現在開始我們就是一分鐘朋友」都好有趣，2位參加者透過互相對望，就可啟動到「1分鐘」嘅音樂同燈光效果，真係好易觸電！展期至下月24日，快啲把握機會去打卡喇！而添馬公園嘅50米光影隧道，更因應主題換上粉紅燈光效果，展示好多心形圖案，好浪漫！