被追問減肥秘方 任賢齊：人間煉獄

減肥絕對係唔少女士嘅畢生事業，但大家發唔發覺，有時無論做幾多運動、食幾少都好，體重都依然無郁過，令人十分灰心，不過唔緊要，事關我哋有最佳榜樣任賢齊！小齊舊年為拍攝電影《跑馬》，一日食足六餐，增肥至220磅，出現嚴重胃酸倒流，血糖同血脂都超晒標，肚腩大到連佢都忍唔住自嘲似孕婦。

正當大家都好膽心小齊健康之際，佢竟然只係用咗短短約三個月，就踢走50磅肥肉，體重回復至約170磅巔峰狀態，近日佢現身內地出席活動，唔止肚腩無晒，連個樣都變返以前一樣英氣十足，搞到內地演員楊紫都忍唔住於微博問小齊：「小齊哥，你怎麼瘦下來的…？可以告訴我麼」點知小齊竟然話：「妺妹！還是別知道比較好！人間煉獄啊」獲網民大讚幽默。

但其實小齊絕對唔係講笑架，事關佢話除咗要控制飲食，最重要係瘋狂運動，據知，只要唔使工作，每日最少做10小時運動，單身、跑步乜都齊，搞到小齊都要喺微博吐苦水：「這一年經歷了增肥減肥的辛苦！高強度的訓練、身體的疼痛、精神的折磨⋯⋯」更加上載了腳步受傷的相片，並留言話：「汗水+疼痛，是通往巔峰的必經之路⋯⋯」可見佢做運動做到受傷，都依然繼續堅持，玩到咁大，屋企嘅小朋友千祈唔好學呀！

{{hket:inline-image name="rew.jpg"}}{{/hket:inline-image}}

任賢齊微博

{{hket:inline-image name="gd.jpg"}}{{/hket:inline-image}}

任賢齊微博