叱咤樂壇流行榜頒獎禮終於圓滿結束，多年來被網民恥笑是「撒旦吻過的聲音」的古天樂，竟然真係被推到上台，憑半首歌《（一個男人）一個女人和浴室》奪得「我最喜愛男歌手」，更成為首位歌影視大滿貫的藝人，不過宣布得獎之前，古仔就被出名詞鋒銳利的林海峰，所搞嘅氣氛搞到有啲著著哋，到佢上台嗰陣竟然爆粗：「X......嚟，唱吖！」到底古仔係堅嬲定只係玩？觸發網上唔少討論，更爆出連串是非。
林海峰發表偉論 疑辣著古仔
為咗介紹古仔攞獎，林海峰竟然喺台上講足1分20秒，而且話中有骨：「我記得以前上台得獎嘅歌手都曾經試過喊住同大家講話：『我真係好鍾意唱歌㗎！』今日一位候選人古天樂先生，每次佢上台嘅時候當觀眾話：『喂唱歌吖、唱歌吖』，你愈係叫佢唱，佢愈係唔唱嘅。而佢最近講過話，佢唯一肯唱嘅要求就係唔唱Live。」而講到呢度，林海峰更愈講愈黑面：「正所謂個個都拍拖，唔通個個都想拍拖，咁個個都唱歌，唔通個個都想唱歌咩？咁但係如果你今晚投票俾佢，佢最尾係贏咗嘅話，我哋都會頒獎俾佢㗎喎，冇辦法㗎，因為你最喜愛投咗畀《今期流行》吖嘛，所以我好希望如果古天樂今晚真係能夠勝出嘅話，不如由聽日開始派一首新歌，一直派新歌派到年尾，然後出一張個人唱片，再喺紅館舉行個人演唱會吖，得閒嘅話book個添馬艦，做一個免費音樂會畀大家睇facebook live，回報每一個投你票，喜愛你嘅樂迷，承擔起一個叱咤樂壇《我最喜歡男歌手》嘅愛同責任。」難怪宣布古仔得獎後，佢上台嘅感言都被指係回應林海峰：「我真係好鍾意唱歌，只係唔識唱啫。呢個世界真係好奇怪，我都可以行得上台，拎呢個獎我真係無嘢好講。」之後古仔仲將矛頭指向對方。
古仔：我請假過嚟嘅，成粒鐘坐喺出面，不如咁吖搞吓氣氛吖，你咁叻頭先。
林：唔好玩我啦！
古：唔好啦！
林（瞪大雙眼）：你係咪要玩呀！
古：11點幾喇喎，就嚟12點幾啦！
林：唱歌吖！
古：X......嚟，唱吖！
林：睇你咋
古（邀請台下歌手合唱）：一齊上嚟唱！
之後古仔就清唱其代表作《男朋友》。話晒古仔都係一線巨星，竟然喺台上爆粗，連神「雕」都拎埋出嚟，難怪網民嘅反應都好大吓：「林生以為自己係名DJ就可以係人都寸？真以古仔無料到？」、「佢講X嗰吓真係好X型，林海峰輸晒」不過亦有人認為古仔無睇場合：「話晒佢都係演藝人協會會長，大庭廣眾講啲咁嘅嘢，有失身份囉，係都返後台先X啦！」 與此同時，今次古仔得獎亦掀起連串爭論：「佢係由全民投票下大熱奪獎，的確係實至名歸」，然而亦有網民不忿商台亂派獎，於討論區引起罵戰：「成件事好悲哀，抹殺咗其他歌手全年嘅努力，香港頒獎禮真係得啖笑」、「嗌人一齊上去唱個吓真心好老尷，叱咤頒獎以為最公道，但睇叱咤心態當係睇fashion show + talk show」、「結果同時反映到現時樂壇同投票者嘅質素同情況，樂壇已死」。
成首位歌影視大滿貫之人
雖則部份網民鬧爆，但古仔真係厲害，計埋昨晚男歌手一獎，原來他是首位歌影視大滿貫之人。入行TVB僅6年，1999年古仔已憑《刑事偵緝檔案IV》徐飛警長一角奪得視帝，去到2001年古仔又憑穿越劇 《尋秦記》 的項少龍再次成為視帝。去到2017年，古仔在電影《殺破狼·貪狼》化身打仔拳拳到肉，榮獲第十二屆亞洲電影大獎、香港電影導演會年度大獎以及第37屆香港電影金像獎的影帝，加埋今次叱咤，呢鋪歌影視都真係畀佢玩晒啦！
▼視帝
▼影帝