《大帥哥》播出之後唔少人大讚曹永廉同張衞健嘅互窒場面好有火花，仲有觀眾話佢咁多年個樣都冇變過，同18年前《妙手仁心II》完全冇分別，簡直好似食咗防腐劑咁。其實保養唔再係女藝人嘅專利，隨住時代進步，唔少男藝人駐顏有術，明明有一定年齡依然皮光肉滑，搞到大家單靠個樣好難估到佢哋嘅真實年齡。以下呢10位男藝人，大家聽到佢哋嘅真實年齡實隨時會嚇一跳，大叫佩服！
曹永廉
曹永廉個樣好似30幾歲，一條皺紋都冇，望落跟同劇演員──35歲嘅洪永城好似差唔多年紀。點知原來佢係1964年出世，依家已經54歲喇，阿廉相比起同齡嘅古明華，真係keep得好好！難怪拍緊《兄弟姐妺去旅行》嗰陣，連蕭正楠都話曹永廉：「凍齡人係應該唔怕凍！」
林志穎
林志穎係出咗名嘅童顏明星，就算依家俾人叫做「小旋風」、「小志」、「小林」都唔突兀。因為明明1974年出世已經44歲，仲係3個囝囝嘅爸爸，但個樣依然勁靚仔、英氣逼人，甚至同20幾歲嘅後生仔冇分別。
梁朝偉
1962年出世嘅偉仔年屆56，不過依然有好多少女視佢為男神。近日有網民就喺日本巧遇偉仔，好開心咁話：「今天遇見了最帥的男人，親和力強，不怕素顏，永遠的男神。」睇返偉仔同木村拓哉N年前幫雜誌影嘅相，偉仔直頭冇點變過，勁！
郭晉安
小編之前喺度追返《創世紀》嗰陣，感覺依家嘅安仔同當年嘅馬志強好似差唔多咁，但其實安仔1964年出世，有54歲㗎喇。佢喺1985年已經出道，1986年憑住《城市故事》開始引起觀眾注意。
孫耀威
孫耀威雖然叫做老孫，不過外表一啲都唔老，仲好後生，原來1973年出世嘅佢有45歲㗎喇！喺1995年同日本女星酒井法子合唱《有緣千里》，仲一度紅到去日本、韓國發展。
杜德偉
杜德偉1963年出世，今年55歲，咁多年嚟佢個樣都冇乜點變，全因佢媽媽係華語歌手張露，爸爸係菲律賓籍樂隊領班杜奧利，混血通常靚仔啲、輪廓深啲，自然唔覺得佢老啦。依家佢喺舞台上又唱又跳，實在係保養得非常好。
郭富城
當年唱《對你愛不完》好似仲係琴日嘅事，點知一眨眼偶像已經過咗5字頭。1965年出世嘅城城已經53歲，身為天王由出道到依家時刻都keep住最佳狀態同身形，依然係好多粉絲心目中嘅夢中情人。舊年佢同方媛結婚，雖然被外父話：「我從小聽你的歌到大的！」不過佢同方媛不知襯，完全睇唔出相差22年，唔通同後生女一齊係保持年輕嘅秘訣？
古天樂
一直被人叫「黑馬王子」梗係唔係浪得虛名，1970年出世嘅古仔，唔係好耐就要踏入50大關，但依然咁有型靚仔，身形亦幾乎冇走樣，除咗因為有做開運動之外，晒黑可能係其中一個睇唔出皺紋嘅方法。
張智霖
目測只有30幾歲嘅張智霖不嬲都俾人話唔識老，我哋仲叫緊佢初哥哥，不過其實佢1971年出世已經47歲㗎喇。出道到依家個樣冇變過，個酒窩令佢更加charm。
苗僑偉
今年6月滿咗60歲嘅三哥，喺佢身上完全睇唔出歲月嘅痕跡，反而覺得佢愈來愈型，睇落相當後生。其實佢同老婆戚美珍結咗婚成30幾年，小朋友都20幾歲㗎喇。
除了以上十大，仲有位好想講，雖然佢40都未過，未可以話佢不老藝人，不過佢係出咗名嘅童顏代表，相信10年之後佢喺時代巨輪下個樣仍然可以逆生長。呢位就係張彥博，佢喺《一屋老友記》飾演廢青、《跳躍生命線》飾演啱啱出班嘅救護員，好多人以為佢係TVB藝員訓練班嘅新人。但原來佢38歲，早喺13年前已經出道㗎喇！