近日一名拉丁美裔歌手Rapper Lil Pump於新歌《Butterfly Doors》以一句「They call me Yao Ming (姚明) cause my eye real low Ching Chong(他們叫我姚明因為我眼睛很扁)」涉及辱華！除「Ching Chong」一字帶有侮辱性，Lil Pump仲邊唱邊拉長雙眼，嘲笑華人眼細，惹怒一眾華人。結果本港rap界代表MC Jin忍不住出手，用1分鐘自創rap歌反擊Lil Pump：「Yellow black white brown any shade that comes to mind,Fact is racism are color blind (黃黑白啡關甚麼事，總之種族歧視如同色盲一樣）」歌詞句句中point，Lil Pump馬上笠水道歉，表示不是有意要傷害任何人，又澄清喜歡所有種族的人，自己也有亞洲朋友。事後很多網民封MC Jin為民族英雄，但很多人只看到他成功一面，很少人知道他背後的辛酸，原來MC Jin一路走來的人生可謂峰迴路轉，竟然試過捲入黑幫槍撃事件，甚至放棄Hip Hop差點做了茶記！
少年得志連累好友中槍 想過放棄音樂做茶記
MC Jin在美國出世，自小已愛上Hip Hop Music、立志要做Rapper。直至2002年MC Jin在音樂節目《106 & Park》rap贏多位黑人rapper，連續7個星期奪冠，登上名人榜，更與唱片公司簽約，終於走上人生第一個高峰。當時MC Jin工作量與收入急增，不過年少氣盛，MC Jin未懂得收斂自己，2003年竟與一位跟黑幫勢力有關的Rapper在酒吧發生衝突，其Rapper好友為他擋子彈受傷，此事當年被記錄於《紐約時報》中。
4年後MC Jin脫離唱片公司，這段時間沒有公司撐，風光不再，面對相當難捱的日子：「有公司嗰4年係順利嘅，搵好多錢，但搵幾多使幾多，有時仲會使凸。到冇公司之後人氣同工作即刻跌，所謂嘅朋友同fans都好似唔認得你咁，真係知道咩叫現實。」因生活拮据，MC Jin決定自製混音帶放上網賣，但卻被朋友嘲諷：「乜搞到咁嘅樣呀你？」連他對音樂僅餘的熱情都吹熄。為了維生，當時他想過做侍應或sales:「除咗Rap，我仲可以做到啲咩呢？我真係有諗吓係咪去茶記、Starbucks，宜家傢俬又好，正正經經搵份工，所以嗰陣基本上放棄咗Hip Hop、舞台呢啲嘢，我覺得冇㗎喇。」
重新起步贏盡掌聲
當MC Jin很迷茫時，突然有人問他有沒有興趣在香港出碟，雖然收入不多，但足以維持生活，所以MC Jin決心在香港發展。當時他的新歌《ABC》一推出即在2008年度叱吒樂壇流行榜頒獎典禮獲得「專業推介·叱吒十大第六位」。2010年，MC jin開始在TVB 亮相，在《勁歌金曲》主持；又於《依家有喜》、《點解阿Sir係阿Sir》等劇集客串演出。去到《潛行狙擊》飾演刑事情報科臥底蠟青一角，MC jin出色演技獲得觀眾認同，更被提名「我最喜愛的電視男角色」及獲頒「飛躍進步男藝員」獎項。在港發展期間，不論主持或拍劇，唱而優則演的MC Jin都因為得到觀眾認同而非常滿足。
近年，MC Jin以蒙面人Hip Hop Man的身分參加選秀節目《中國有嘻哈》，從海選到打入12強。雖然中途曾被潘瑋柏、MC Hot Dog批評rap太多英文，但MC Jin超強實力仍被場上所有人稱讚，成為兩岸三地的熱話人物。甚至以《I AM HIP HOP MAN》為題舉行內地巡唱，MC Jin變得謙卑，不再是從前那個自大、闖禍的自己。能透過Hip Hop Man令大眾了解到Hip Hop的歷史，更接受Hip Hop文化，MC Jin坦言已很滿足，又指過去的黑暗日子都是令到自己成長的階梯：「其實我真係唔係好勁，但你問我係咪好努力？係。我係咪好珍惜？係，同埋我好熱愛呢樣嘢。我嘅人生最精粹就係嗰段好黑間嘅時間，係失而復得之後先有依家嘅心態，幾多錢都買唔到。」