45歲吳綺莉性感掘金 養起卓林全家

成日聽人講養兒一百歲，長憂九十九，呢番話對吳綺莉來說，絕對百般滋味在心頭！事關佢嘅寶貝女吳卓林真係多災多難，呢頭同Andi結婚兼開工作室，揚言自力更生，點知轉頭就爆出佢哋全副身家得返20蚊，欠落賓館房租錢，要靠吳綺莉埋單找數，接佢哋返屋企住。不過最離奇嘅係，明明只得廿蚊雞嘅卓林，話咁快又可以搵新地方築愛巢，即係講到尾又係靠吳綺莉。

一個人搵三個人使，身為單親媽咪嘅吳綺莉變相要養起兩頭家，壓力可想而知，難怪佢都要豁出去做醫學美容代言人，最近仲趁聖誕佳節喺微博大晒性感相，只見吳綺莉中門大開兼大騷美腿，45歲嘅佢依然keep得好fit，睇嚟圈中又多一位美魔女，佢仲留言話：「謝謝Sandy NuMe不停的提醒，女人要對自己好一點，任何時候都不要忘了活得漂亮。」到底NuMe係乜水？咪就係佢代言嘅醫學美容囉，係就係有啲hard sell，但無計啦，單親媽咪唔易做呀！

雖然卓林畀自己好多麻煩，但吳綺莉就表明絕對唔會唔理囡囡，仲強調：「我最大的工作是要令我女兒感受良好，其他的都不是一件事。」母愛果然係最偉大！

{{hket:inline-image name="dda.jpg"}}{{/hket:inline-image}}

{{hket:inline-image name="ui.jpg"}}{{/hket:inline-image}}