揭Celine老竇吸金大法 $1200一堂學唱歌

望子成龍相信係唔少家長心願，不過仔女成龍之後，身為家長嘅你又會唔會靠佢哋幫你搵銀？以下係一個真人真事，話說香港出咗個「小巨肺」譚芷昀（Celine），舊年仲唱到去美國節目《全美一叮》，成功為港爭光，不過多得佢老竇譚順生，搞到Celine是非纏身，事關譚生被踢爆Celine得3歲嗰陣，已經用佢嚟sell自己間唱歌學校，兩父女仲成日拍片掟上網谷人氣，令譚生被外界批評當個女做搖錢樹，而最大鑊係，薛家燕竟然公開鬧佢：「食碗面反碗底」，話佢用奸招搶學生，事件鬧到滿城風雨，譚生亦只好轉趨低調避風頭。

不過去到最近佢終於不甘寂寞，上載Celine個妹、年僅5歲嘅Dion的唱歌片段上學校官網，只見Dion人仔細細，但唱功不知幾澎湃，啲海豚音勁到有幾分阿G.E.M嘅影子，由於前車可鑑，隨即惹來大批網民炮轟佢又想拎個女做搖錢樹，對於外界種種指責，譚順生就話有乜嘢問佢哋經理人喎！

{{hket:inline-image name="HTHF.jpg"}}{{/hket:inline-image}}

天價學唱歌

其實睇返譚生間學校「音樂實踐家」嘅官網，一開首已經見到大大個Celine喺度，仲有佢兩父女嘅唱歌片段，之後幾近每個page都見到Celine，堪稱最強生招牌！而在Celine加持下，譚生間嘢絕對係星級學校，但收費當然亦係星級啦！當中一個「音樂錄影唱歌課程」，原價$10800，依家做緊大優惠，只收$4800就有四堂，除開每堂千二蚊，據佢嘅單張話課程內容包括：「針對自選音樂錄影曲目，進行單對單聲樂及歌曲訓練，完成課程後可獲贈一張個人單曲music video DVD」原來錢真係咁易賺！難怪譚生一家短短七年間由北角六百呎單位，搬到柯士甸山豪宅，而據估計佢哋家陣嘅身家已高達五千萬，大家係咪好羨慕呢？

{{hket:inline-image name="da.jpg"}}{{/hket:inline-image}}

{{hket:inline-image name="fd.jpg"}}{{/hket:inline-image}}