歡樂嘅時間過得特別快，好快又要同2018講byebye，回顧今年嘅娛樂圈發生咗唔少轟動大事，唔少睇到大家嘩嘩聲，仲留低好多令人疑幻似真嘅謎團，到底邊一單娛聞最吸引你？令你一見難忘，好想知道真相？
張栢芝 邊個係阿爸？
栢芝自從同謝霆鋒離婚後，雖然緋聞多多，但單單佢都否認，直至最近栢芝突然入養和秘密生B，成功嚇大家一跳，之後佢仲喺社交網站宣布誕下第三胎「小王子」，隨即傳言滿天飛，有人話BB老竇係新加坡富豪，又有人話係內地富豪，仲有人話佢係借種做人工受孕，不過點都唔夠最新嘅傳聞勁，事關竟然有報道話BB老竇係謝霆鋒至真。媽，我好亂呀！
黎明 結咗婚未？
成日聽人講娛樂圈記者最叻作嘢，不過大家記住空穴來風，未必無因，好似今年初突然傳出黎明戀上失婚女助手阿Wing，更驚爆女方疑似懷孕，不過當時無圖無真相，無人影到佢哋一齊，令唔少人都對呢單新聞存疑。點知Leon突然於3月在fb承認戀情，去到4月仲宣布榮升父親，阿Wing誕下可愛小公主，雖然已經有晒真相，但唔少人仲好想知佢哋到底結咗婚未，與及阿Wing有乜嘢咁吸引Leon，可以成為天王嫂？
楊冪 劉愷威 係咪有婚外情？
自從2013年楊冪同劉愷威結婚後，幾乎每隔一段時間就傳出婚變消息，仲搞到佢哋要一齊發律師信澄清謠言，可惜最終兩人都敵唔過種種考驗，於冬至當日宣布離婚，真係夠晒贈興。雖然佢哋強調和平分手，但依然擋唔住無限傳言，由於2015年楊冪傳出與李易峰拍戲撻著，翌年就輪到劉愷威回敬，被指與內地女星王鷗酒店夜會，難免令外界以為佢哋係咪因為第三者先離婚？
吳卓林 仲有幾多醜聞？
回顧今年，吳卓林、吳綺莉同成龍究竟上咗次幾多次娛樂版？真係多到數都數唔晒，不過要數主角中的主角定非卓林莫屬，先有吳綺莉報警指家中失竊，之後卓林同Andi就遠走加拿大，仲被指山窮水盡要拍片尋父搵成龍！及至最近佢哋返到香港，依然是非停不了，呢頭宣布已同Andi結婚，嗰頭就因為欠賓館租房錢，搞到要報警收場，由吳綺莉埋單。到底卓林仲有幾多新聞未爆？去到2019又會再畀乜嘢驚喜大家？
藍潔瑛 邊個係大哥？
上月藍潔瑛突然於赤柱家中暈倒，送院後已證實不治，享年55歲，對於呢位被喻為「靚絕五台山」的昔日當家花旦，離世前的坎坷生活，各界無不感到惋惜，但隨之而來的又是無盡是非，事關她生前接受訪問前曾透露遭兩名娛樂圈大哥施暴，對其心靈造成極大傷害，直接誘發情緒病，引發網民諸多猜測，到底邊個係大哥？
盧凱彤 情緒病復發？
同樣令人惋惜嘅仲有盧凱彤，阿妹突然於8月從高處墮下身亡，享年32歲，由於她未有留下遺書，加上離世前如常工作，令很多粉絲都未能接受她的離開，雖然其後有指阿妹可能因為情緒困擾而輕生，但唔少粉絲對此都抱有疑問。
范冰冰 還咗錢未？
范冰冰於年中捲入逃稅風波後，消失了足足四個月，有指她一直被拘留調查，及至10月，內地有關方面裁定冰冰逃稅罪成，罰款高達10億港元，更有指佢要急急變賣物業還債，但其後就無晒下文。唔少人都好想知到底佢還咗錢未？與及會唔會退出娛樂圈？
陳家樂 洪卓立 有無綠帽？
今年英皇嘅男藝人真係黑仔，事關陳家樂同洪卓立接連被分手，仲要驚爆綠帽疑雲，佢哋嘅舊愛余香凝同湯怡都被指移情別戀，當中余香凝更被發現去咗新歡Victor屋企，雖然係咁，但陳家樂同洪卓立依然處處維護舊愛，直頭好似現代版楊過呀！
黃子恆 係咪做老竇？
多得黃子恆，令娛樂圈渣男又多一個新演繹，事緣有日內地女粉絲Michelle突然衝出嚟，自稱已經有咗黃生嘅骨肉，但對方雖然承認有同Michelle發生過性行為，但強調次次都有做足安全措施，總之一個字「避」，結果惹嚟全城鬧爆，仲有指佢已被TVB高層掟入雪櫃，不過做雪人事小，大家最關心嘅梗係BB係咪佢架啦！