昂坪360聖誕晚宴 齊炮製心形朱古力

最近好多公司都開始食聖誕大餐，黛安就知道昂坪360上星期四（13號）喺迪士尼樂園酒店舉行咗聖誕晚宴，董事局主席楊美珍仲即場炮製心形朱古力，慰勞一班同事！

當晚昂坪360董事局同管理層總動員出席，楊美珍話，港珠澳大橋喺10月正式開通後，昂坪360嘅賓客人數屢創新高，淨係11月每日平均賓客人數就高達7,000人，打破開業以來同月紀錄！佢覺得亮麗數字背後，全賴一眾同事出心出力，所以當晚就同剛委任做署理董事總經理嘅劉偉明、剛剛離任嘅董事總經理關敏怡，同朱古力大師古嘉俊（Jeffery Koo）聯袂，用愛心炮製「同心360」心形朱古力，整好後仲派畀同事分甘同味。

除咗管理層同員工表演外，仲特設100份抽獎禮物，包括iPhone XR、iWatch、5,000元電器禮券等！