又去到一年一度電視界盛事《萬千星輝頒獎典禮》，今年視帝視后嘅競爭非常激烈，喺未知今年結果之前，我哋不如先回顧吓往年頒獎禮最難忘嘅回憶。
1. 最溫馨動人嘅時刻
講到最感動，唔可以唔提肥姐沈殿霞重病現身嗰幕。一向係眾人開心果嘅肥姐從事演藝工作40幾年，喺演藝界地位好崇高，自2006年證實患上肝腫瘤後，肥姐被迫停止工作專心休養。去到2007年頒獎禮當日，一身粉紅色套裝嘅肥姐竟然坐住輪椅出場，全場都企喺身歡迎佢。病魔打擊之下，肥姐消瘦咗好多，講嘢都有啲虛弱同沙啞，但佢心情唔錯，仲擺出一個堅強嘅笑容接過「萬千光輝演藝大獎」：「希望以后有多啲機會同大家見面，我希望自己嘅健康一日比一日進步，我唔會輕易放棄我最鍾意嘅電視事業嘅，Thank you！」見到咁感人嘅場景，台上嘅一眾花旦，如黎姿、佘詩曼、狄波拉、鄭裕玲等都忍唔住感動到淚流滿面，紛婦簇擁到肥姐身邊，同佢合照。
2. 最妙語連珠嘅得獎者
王祖藍出名口才好、轉數快，喺2008年得到「飛躍進步男藝員」嗰陣佢設計咗水蛇春咁長嘅辭謝詞，用急口令形式講晒出嚟。感謝名單由高層到清潔部，由中學老師到幼稚園老師都有提到，最後仲自嘲其貌不揚，咁都有變攞要多謝耶穌，內容精簡有力，仲好好笑。
除咗祖藍，估唔到連許紹雄口才都唔錯，2012年頒獎禮許紹雄頒獎嗰陣俾工作人員催佢講快啲，佢激到一輪咀鬧：「我哋喺度大晒，我哋鍾意頒就頒，唔鍾意頒就唔頒，鍾意講就講，唔鍾意講就唔講！我講緊梁博士依家擦緊鞋你就阻我擦鞋，你都唔識撈嘅！你想唔想加人工！」去到2015年頒獎禮，黃德斌話唔想阻住佢出去搵真銀，佢一聽到就話要糾正德斌：「TVB從來冇俾過陰司紙我，雖然佢係比出面少，但都係真嘅！」，搞到全場大笑。
3. 最蝦碌嘅嘉賓
喺揭曉得獎者嗰陣，有時場面緊張到連頒獎嘉賓都會蝦碌讀錯字，好搞笑。例如1998年頒獎禮楚原就將張家輝講錯咗做資深音樂家顧家輝，仲話：「呢個名我好熟啊，起身啦，顧家輝啊！」，之後仲一面疑惑：「唔係顧字咩......」不過最蝦碌都唔及修哥胡楓同埋達哥劉以達，佢哋先將2011年頒獎禮講咗做2001，冇啦啦帶大家返返去10年前；又以為有提名名單嘅片段睇，搞到鄭裕玲冇咁好氣：「冇提名㗎，揭曉得㗎喇！」；最後甚至講錯得獎者鄭嘉穎個名，變咗做鄭嘉「潤」...成份講稿冇樣嘢講得啱！認真厲害！