《大帥哥》足本NG片笑到噴汁 工作人員得罪張衞健

《大帥哥》又嚟喇！很多網民大讚張衞健搞笑又浮誇的演技永遠不會覺得老套，亦只有他夠氣場能carry到，其他演員亦明顯有夾過，愈做愈自然。其實張衞健除了晚晚同觀眾大玩金句，估唔到連NG片都精彩過人，近日TVB就於社交平台上載幾段《大帥哥》絕密NG片，竟然有工作人員大膽到得罪大帥哥，真係笑到噴汁！

話說當時工作人員正在黐道具嗰陣，張衞健情深深地答謝：「唔該你吖，你對我真係好！」點知對方竟回答由細睇到佢大，令年屆53歲的張衞健即時中箭，使出大反擊：「咩叫由細睇到大啊？你話經常睇、成日睇，部部戲我都睇，得唔得啊？咩叫由細呢？」，連其他幕後都幫口話嗰位工作人員：「你講咩啊！」當時張衞健塊面仲黑黑哋，似乎係堅嬲喎，嚇到該工作人員即時認錯，跟住大帥哥嘅對白講一次大賣口乖巧，喺呢個時候張衞健塊面由黑變白，露出滿意笑容，到底佢係開玩笑定真係嬲？俾你咁易做到就唔係大帥哥啦！

{{hket:inline-image name="15.jpg"}}{{/hket:inline-image}}

{{hket:inline-image name="16.jpg"}}{{/hket:inline-image}}

而同蔡思貝做對手戲嗰陣，都一樣出事呀！當張衞健在大帥府拯救蔡思貝時，他講對白就邊食螺絲邊講：「我女人呢就不求同年同日生，但求同年同日同日死」。之後畫面一轉，張衞健本來想講「古人講得好，異性相吸啊？」，但口誤講咗「男性相吸」，即刻連自己都大笑出聲，講笑話自己變基：「哎呀，出櫃喇我今日，俾人知道咗添！」，連工作人員都附和：「好大膽！」唔止性取向變，佢仲詛咒蔡思貝死？有一幕原本劇情講到蔡思貝要打開燉盅蓋，未開拍前張衞健問導演：「你想思貝一嚟開蓋，定想佢一嚟釘蓋？」，蔡眾貝聽完都呆咗，仲惹得全場工作人員爆笑！而張衞健在劇中常常把玩口中的火柴，點知有次講講吓對白跌落地，本來張衞健想扮冷靜繼續做戲，但蔡思貝忍不住大笑。

其實張衞健好少NG，反而其他演員見到張衞健出現，就個個開心忘晒形搞到瘋狂NG！好似簡淑兒一開始勁黑仔講錯幾次對白，講完touch wood馬上摸摸木枱面希望甩掉衰氣，不過張衞健就好不屑咁話：「Touch都冇用啦，想唔想唔NG吖？Touch me，don't touch wood!」搞到全場爆笑，嗱！呢啲咪急才囉！而去到軍校演練場口，有個大配角起飛腳時，唔小心仲將腳放喺張衞健頭上面。嚇到他連忙道歉，但張衞健好有風度咁話：「唔緊要，繼續做落去啊嘛！ok㗎，唔使驚，唔踢都踢咗喇」，唔理中唔中腳，都以拍攝行先，認真專業呀！

{{hket:inline-image name="14.jpg"}}{{/hket:inline-image}}

{{hket:inline-image name="17.jpg"}}{{/hket:inline-image}}

▼兩條足本版NG片

{{hket:youtube id="7nvGwkwPyiA"}}{{/hket:youtube}}

{{hket:youtube id="MBSfRPC1VlM"}}{{/hket:youtube}}