繼推出英文版自傳後，成龍最近又有驚人搞作，就係推出新專輯《我還是成龍》，大哥仲標榜呢集碟係佢唯一有份全程參與嘅音樂作品，大家係咪好期待先？而為咗滿足粉絲想親近大哥嘅心願，成龍仲搞咗個活動，請粉絲分享溫暖故事，頭三名可以參加大哥新碟發布會，喺現場聽大哥唱live。
新歌送給至親 獨欠卓林
本來出新碟係開心事，弊在就竟然惹嚟網民炮轟，事關大哥聲稱每首歌都係佢自己嘅故事，每首歌都係唱給身邊人聽，當中《別放棄》就係送畀兒子房祖名，皆因佢自從涉毒被捕後，幕前生涯從此玩完，雖然佢自稱轉戰幕後，希望做導演，但至今都未有作品面世，反而成日被傳媒影到四圍蒲，難怪大哥都要憑歌寄意整首《別放棄》畀祖名！但其實佢個女吳卓林近年同樣多災多難，唔止多次傳出財困，更搞到要公開尋父，弊在大哥依然當睇佢唔到，搞到大批網民又再發火：「連手足兄弟都有歌聽，但你個女呢？你點做人老竇」、「見成龍唱歌，令我諗起忌安。」
其實又難怪大家咁嬲嘅，事關大哥今次隻新碟真係送晒畀至親，就連舊愛鄧麗君同一班兄弟都有份，有請大哥親自簡介以下幾首新歌！
兄弟情《青春故事》──「一班兄弟同我生死與共，為我遮風擋雨，之前成家班40周年，我播呢首歌畀大家聽，百幾人都聽到喊。」
逝去的人《物是人非》──「有好多我曾經愛過、已經走咗，或者呢世都再見唔到嘅人，當中包括鄧麗君，當然亦包括以前關懷過、幫過我嘅長輩」
送給老婆《謝謝一輩子》──「呢首歌我有份填詞，因為想講一啲以前從來無講過嘅說話，畀我生命中最重要嘅人聽。」
孝順之情《愛情老了》──「中國人不太願意表達愛，尤其好似我父母個代嘅長輩，佢哋唔會將愛掛喺嘴邊，但其實我知道佢哋嘅愛有幾深。」
成龍微博