迪士尼幻想工程香港挑戰賽 薩凡納學生奪冠

迪士尼樂園總係畀人一種夢幻嘅感覺，一班大專生就參加咗「迪士尼幻想工程香港挑戰賽2018」，充分發揮天馬行空嘅創意，重新設計一個全新嘅探索娛樂體驗，黛安都好期待日後有機會可以玩到啊！

聽公關姊妹講，挑戰賽今年已踏入第8年，從世界各地選擇一個自然或古老奇迹，設計全新探索娛樂體驗做題目，最後收到70幾份作品，其中8間嚟自本地同內地大專院校嘅學生仲成功晉身最後階段，認真厲害。

而今次冠軍得主係嚟自薩凡納藝術設計學院嘅學生Dilara Polat同Yasmin Baratova，佢哋分別喺土耳其同烏茲別克出世，之後再來港進修。佢哋設計嘅故事，係以古代世界七大奇迹之一阿提密斯神殿做故事背景，設計咗四艘具唔同特色嘅船隊，喺「時間洪流」中完成一段又一段嘅驚險刺激旅程。佢哋仲可以去到美國加州迪士尼幻想工程總部考察交流，甚至可以有面試同實習機會，仲可以喺香港迪士尼樂園度假區參與6個星期嘅工作體驗呀。

評判話，佢哋嘅設計好有故事性，睇得出做足資料搜集，仲善用「時間洪流」嘅概念，同一個地方、每一幕畫面都唔同。