Big Mac 50周年 強勢回歸兼推珍藏版套裝

麥當勞Big Mac向來係黛安嘅摯愛，聽公關姊妹講，舊年全港就賣出超過430萬個，非常厲害！適逢Big Mac 50周年，Big Mac同Double Big Mac超值套餐今日起強勢回歸，仲有「Big Mac® 50周年珍藏版套裝」，粉絲們唔好錯過啊！

唔講唔知，原來Big Mac已經有50年歷史，係由美國賓夕凡尼亞州特許經營商Jim Delligatti研發，係1968年正式登場。入面有7種材料，兩塊軟嫩juicy嘅百分百純牛肉配上鬆軟芝麻麵包、新鮮生菜、清爽洋蔥粒同醒胃酸瓜，夾上香濃芝士同秘製醬汁，睇落簡單平凡，其實要根據黃金標準完美結合，成為麥當勞跨時代經典之作。

姊妹話，為慶祝50周年，今日起Big Mac同Double Big Mac超值套餐再度歸來，分別以28元同34元優惠價推出，只要加4.5元就有加大套餐，配大脆薯皇或大薯條、大汽水；或者加7.5元配大大啖組合，配大脆薯皇或大薯條、珍寶新地樂。聽講，麥當勞仲第一次推全新「芝味藍莓批」，金黃香脆外層包裹住酸甜嘅芝味藍莓醬，芝士迷一定要試啊！

而黛安最想擁有嘅係「Big Mac® 50周年珍藏版套裝」，用Big Mac做主題嘅儲物盒同購物袋，儲物盒仲係雙層設計，適用於微波爐同洗碗機，用嚟帶飯就啱晒啦！今日起只要購買任何食品加80蚊就可帶返屋企啦！