要數最受歡迎的港產超級英雄，徐錦江肯定上榜，事關他之前已經表演同「雷神」撞樣，搞到基斯咸士禾夫都話想搵佢做替身，而估唔到玩完Marvel，徐錦江今次就過檔DC，事關近期DC大作《水行俠》（內地譯《海王》）在內地上得如火如荼，票房已衝破六億大關，連帶男主角Jason Momoa亦人氣急升，不過就有眼利網民發現佢個樣竟然又同徐錦江撞樣，仲施展P圖絕技，睇落都真係有8、9成相似架，而多得網民厚愛，徐錦江更登上微博熱門搜尋，「想去看徐錦江主演的海王」足足有86萬人次搜尋，名列第三位，認真誇張。
睇見網民咁支持自己，徐錦江唔止留言：「感謝把我送上熱搜的您們」，仲專登走去踩場，同Jason Momoa嘅人形公仔合照，輕鬆贏得14萬個likes！而咁啱Jason嚟到內地宣傳新戲，傳媒就索性幫佢哋兄弟相認，拎徐錦江張相畀佢睇，搞到Jason都好驚訝：「真係嘅？估唔到我有個分身喺中國，我好想見佢！」連正版都話似，足證徐錦江真係有超級英雄嘅基因架，據聞《水行俠》計劃開續集，唔知會唔會預埋徐生？
網上圖片
徐錦江微博
徐錦江微博
網上圖片