近日飾演美國隊長足足八年嘅Chris Evans喺Twitter宣佈已完成《復仇者聯盟4》所有拍攝工作,美國隊長正式收山退出Marvel電影系列,令唔少粉絲大叫不捨,但其實唔單止美國隊長,有傳Iron man、變形俠醫與雷神都將會相繼退出復仇者聯盟,意味Marvel可能要重新洗牌。
四大如此受歡迎的角色退休,相信肯定令Marvel高層頭痛,不過佢哋唔使擔心喎,事關我哋有創意無限嘅網民,佢哋發揮P圖神功成功打造港版復仇者聯盟,當中郭偉亮嘅Iron man、徐錦江嘅雷神,直頭可以A貨變真貨,不過最驚喜嘅竟然係唐三藏羅家英都過檔,化身死對頭蜘蛛精,唔係,係蜘蛛俠至真,係咪夠晒贈興先?
黑豹──樊少皇 相似度:8/10
唔拼埋一齊都唔知Chadwick Boseman同樊少皇堅係有幾分相似,尤其係佢地嘅濃眉大眼加埋鬍鬚,直頭好似孖生咁,再加上樊少皇出名打得,喺成名作《力王》已經做過漫畫主角,再做《黑豹》冇難度。
變型俠醫──羅莽 相似度:7/10
羅莽身形一向健碩,本身個pizza面直頭同變型俠醫倒模一樣,再加上佢咬牙切齒個樣簡直一絕,用埋招必殺技「自投羅莽」,實可以嚇窒對手。
緋紅女巫──謝安琪 搞笑度:7/10
小編估因為謝安琪做過《殭》,所以位改圖巴打就拼左落緋紅女巫度。不過網民唔多buy,話Kay bb唔可以同Elizabeth Olsen相比,笑佢冇放大睇仲以為係杜如風,建議搵不老女神邱淑貞好過。
雷神──徐錦江 相似度:10/10
媽~~好亂啊。呢個咁經典唔使我多講都知幾似,簡直一模一樣,好多網民以為冇改過圖添啊。
Iron man──郭偉亮 相似度:9/10
呢個都係另一個經典,似到太興都搵佢拍返條同Marvel風格差唔多嘅廣告。網民留言:「差碟叉燒飯」、「新鮮出爐」
美國隊長──古天樂 搞笑度:10/10
一個黑一個白應該搞笑多,有人提議陳豪、吳彥祖好似好啲。
寒冬戰士──馮德倫 相似度:8/10
第一次見到寒冬戰士有啲熟悉嘅感覺?你係咪覺得好似馮德倫啊?因為佢個樣都鬼鬼地,除左髮型之外連個樣都有少少似,勁match。
奇異博士──張松枝 相似度:3/10
張松枝唔係比人話係港版孔劉咩?依家突然又變咗外國人做奇異博士?有網民覺得搵吳岱融襯啲,或者陳啟泰、河國榮就仲似。
黑寡婦──楊怡 搞笑度:6/10
Scarlett Johansson同楊怡大纜都扯唔埋喎!網民笑上圍差別太大喇,起碼要女神朱茵咁靚咁玲瓏浮突先似啲。
蜘蛛俠──羅家英 搞笑度:10/10
救命,估唔到除咗頭套原來係咁。由老人家扮一個後生仔太好笑!特別係搵家英哥,笑到流晒眼水出嚟啊。
除呢幾個明星,有網民亦改左啲圖比第二啲人選我地,你覺得邊個最似呢?不妨留言講下!