梁烈唯性格剛烈、講嘢直接，入行14年間因為爭議言論周圍辣咗唔少火頭，仲俾網民稱為「負皮王」，但自從佢做咗爸爸之後就好少喺社交網站度發言，原來佢為囡囡同老婆Tina改變咗好多。首先因為自覺責任大咗，梁烈唯變得慳家，連名牌都唔買：「（結婚）初期仲係好自我，鍾意買乜就買乜，鍾意買乜車就買乜車，但直至我哋囡囡出世之後唔會亂咁買嘢、亂咁洗錢，就算好鍾意嘅車都唔會買，依家會真係需要先買。」成為爸爸，就連想代言品牌都由奢侈品變成家居用品：「以前係想名錶、車呢啲，例如廚具、雪櫃，自己比較鍾意煮嘢食，始於依家係個爸爸，family啲嘅嘢會啱我啲，動輒幾千萬一隻錶就唔係好適合我。」
面對以前種種錯誤，梁烈唯冇後悔過入行，雖然俾人出賣過、俾網民痛罵過，有諗過閂咗社交網站唔再玩，但佢就話如果冇之前嘅種種根本冇依家嘅自己：「所有愛錫我嘅人、得罪我嘅人、唔喜歡我嘅人佢哋所做嘅野都好緊要，冇咗其中一塊拼圖都冇我依家成長咗嘅模樣，所以我唔會因為網民唔開心而好想抺走過去。」如今梁烈唯唔敢講依家嘅自己係最好，因為沒有最好，只有更好，不過對待網民嘅態度好明顯溫和、謙卑咗好多：「網絡世界訊息萬變，呢一刻可能係鍾意呢啲嘢，嗰一刻已經係唔鍾意，要我一個老套嘅人迎合啲咁新潮、變化得咁快嘅世界係有啲辛苦。咁但係我絕對唔介意，我都會活到老，學到老，希望自己可以喺呢度學好啲，成為你哋嘅正皮王。」梁烈唯最後話每個人都有做錯決定嘅時候，只要繼續努力自己嘅工作，大家會睇到嘅。
▼依家梁烈唯成個湊女公咁，好sweet啊
場地贊助：All In Burger & Bar
Shop B, G/F, Sun Chun Building, 4A-7 Sun Chun Street, Tai Hang