古天樂多年來一直努力推動電影發展，但有時熱心過頭就好易出事，由於佢實在太勤力，所以拍咗唔少被外界彈到一文不值嘅戲，好似舊年佢有份投資嘅《喵星人》，投資高達兩億，但內地票房僅收四千幾萬，真係蝕到入肉。
雖然市場證明呢類科幻怪獸片唔多受歡迎，但呢啲咁嘅小事，又點可能嚇親古仔吖，最近佢又再擔正打怪獸，套戲叫《武林怪獸》，導演係劉偉強、監製係爾冬陞，製作費當然又係億億聲啦！不過最正都係主角、即係隻怪獸個名，佢叫「旺財」，係咪好狗呢？講到今次又要同「空氣」做對手戲，古仔都話有難度：「最難忘係要同怪獸一齊演戲，要靠好多幻想去做。」
大家係咪好想知套戲講乜呢？話說係明朝時代，官府出動重金捉拿喺宮中逃走嘅怪獸，有錢搵，各方英雄好漢當然唔會執輸，一齊出動捉怪獸啦！聽完係咪好想捧場先？放心，套戲聖誕喺內地上先，之後1月就會喺香港上映，到時大家又有機會欣賞古仔嘅精湛演技喇！