去到年尾又係時候要頒發樂壇成績表，喺明年1月1日舉行嘅叱咤樂壇流行榜頒獎典禮，近日開始接受投票。根據電台公佈的最新戰況，「我最喜愛的男歌手」十強除咗有大家好熟悉嘅陳奕迅、張敬軒等歌神外，擁有「天籟歌聲 」嘅「樂壇隱世高手」古天樂都有份入圍，搞到一眾網民都非常興奮，猶記得當年古仔出過四張碟，當中《今期流行》裡面嘅「拜四角舞」更hit足幾十年，就連早前古仔客串拍廣告重現《今期流行》經典場口亦成為網上熱話，可見佢喺樂壇嘅人氣有幾勁。
(廣告截圖)
難怪今次佢同謝安琪合唱《（一個男人）一個女人和浴室》，雖然只係得半首歌，都依然能夠入圍十強，對於有網民話要一人一票推到佢同陳奕迅同台唱live，古仔都顯得有啲受寵若驚：「冇諗過再唱歌呢個問題，當初係因為謝安琪呢個係一個電影故事，後來變成咗一首歌，係無心插柳。入到十強已經好厲害，好開心，我諗唔會贏到陳奕迅掛？」雖然把口就好謙，但查實古仔不知幾重視今次再戰樂壇，事關佢將首歌嘅MV放咗喺自己微博，實行日播夜播，兼留言話：「期待已久！」難怪唔止香港網民，就連內地網民都好興奮咁話要一人一票推到佢攞獎，哇！數數手指，古仔微博有成一千二百萬粉絲，如果人人都投佢一票，真係Eason都要彈開呀！所以大家識做啦，今次投票喺11月30日截止，到底古仔有無機會攞獎，甚至上台唱歌，就要靠大家喇！
(叱咤官網)
(叱吒官網)
(MV截圖)
(宣傳照)
▼連古仔自己都咁，你冇理由唔投佢一票呀嘛？
(古天樂微博)