冬季購物節 冬日美食節 一站式嘉年華22號開鑼

一年一度嘅「香港冬季購物節」同「香港冬日美食節」又嚟啦，今年將於12月22至26號喺會展舉行，有800家參展商，攤位數目多達1,300個，簡直係最大型嘅室內聖誕嘉年華啊！

聽公關姊妹講，今年展覽應有盡有，除咗購物節同美食節外，同期仲有「數碼生活及車品博覽」、「香港冬季玩具博覽」同「香港家居潮流博覽」，真係由內到外，再到汽車精品配件、智能電玩用品，咩都有齊啊，大家行一轉就可以買晒所需返屋企！

香港冬季購物節展區包括嬰幼兒用品區、美容保健區、冬日繽紛手作大街等，商家仲有大量獨家優惠。同場嘅美食節就有9大展區，包括「至尊品牌區」、「韓潮食品區」、「賀年食品、糧油及蔘茸海味區」等，當然唔少得每年必搶嘅1蚊精選美食優惠啦，黛安已叫咗媽咪齊齊去辦年貨啦。

姊妹話，今次展覽預期總入場人次高達145萬，唔想同人逼，就要早啲嚟啦！美食節早場優先券每人10元，只適用喺12月22號早上10點到中午12點半；想去多幾次，仲有購物美食節5日通，每人只需要20元咋！