正所謂山寨無極限，內地不時出現極品山寨貨，不過今次呢套由方中信、陳志朋與顏丹晨等人主演的《夢境之源》，就絕對堪稱最醜山寨貨，事關套戲竟然照抄8年前的荷里活大作《潛行空間》，內地譯作《盜夢空間》，8年前嘅作品依家先抄，係咪out到爆先？
或者你會問，當年《潛行空間》用成億億聲美金打造超真實的夢境世界，贏盡票房口碑，咁做山寨貨要抄人哋啲特技，都要花唔少金錢同時間喎！不過大家唔使擔心，佢哋嘅重點係抄咗人哋張海報，望落九成一樣，成本超低，而套戲其實係一啲科幻特技都無，不過喺劇情方面都有向《潛行空間》致敬，同樣係同夢境有關，講述飾演貨車司機的陳志朋，由於童年時代的不幸遭遇，變得內向懦弱，更頻頻做噩夢，直至睇心理醫生，先發現夢境背後埋藏一宗兇殺案，劇情係咪好吸引呢？難怪《夢境之源》於本月16日在內地上映至今，票房只得26萬人民幣，觀眾齊齊以行動向呢套災難山寨貨說不，不過最尷尬都係，方中信於微博留言：「預祝#夢境之源#首映成功！」真係夠晒贈興呀！
網上圖片
網上圖片
網上圖片