廿四孝老竇方中信

方中信呢位猛男，神高神大，又眉粗眼大，如果佢碌大對眼望住你，自然感受到一股強大煞氣。

不過，佢工作同返到屋企分別係兩個樣：當佢返到屋企，係一名廿四孝老竇，簡直係「冧爆」樣，為咗方大小姐，呢位廿四孝老竇最鍾意嘅玩車癮都要擺埋一邊。個女未出世就換咗架四平八穩嘅保母車，而家有個千金坐喺車上面，佢更加小心駕駛，冇得再做飛車黨囉！

方中信有時都會放個女啲相上互聯網，同大家分享佢做老竇嘅心得。某日發現，有人放咗張方大小姐，同一個得意小男孩搭住膊頭仔，又頭碰頭咁影相。本來冇乜嘢，點知方中信搭訕話：「救命呀！還未到五歲！！」而身為人父嘅麥長青都忍唔住插口話：「方生，你諗多咗啦！」做老竇嘅一定好緊張個女，因為會驚個女畀人呃。

個女五歲都未夠，老竇已經咁緊張，將來方家有女初長成，相信呢位型男老竇一定要睇到實。

(本欄逢周三刊登)