恭喜！恭喜！鄭嘉穎同陳凱琳今年8月先結婚，估唔到短短三個月就成功造人，嘉穎仲喺IG宣布喜訊：「感恩節，一個為了慶祝和感激我們所擁有的節日。在這個特別的日子裡，我和我太太想分享一份大禮物，就是我們家庭將會有一個小寶貝！」佢又話會努力學習做父母，盡最大努力照顧嚟緊嘅新成員。由於之前一直有傳佢哋咁急結婚，係因為奉子成婚，所以喜訊一出，又再惹嚟唔少網民嘅揣測，不過原來大家最關心嘅竟然係嘉穎嘅歲數問題，「佢已經49歲，將來個B讀大學，佢都攞緊生果金啦！」、「照顧BB真係要花好多心力，佢工作咁忙，掂唔掂架？」
鄭嘉穎IG
陳凱琳IG
庾澄慶微博
不過其實大家又毋須過慮嘅，講真家陣醫學發達，49歲都可以好後生，仲有大把青春，而且對比57歲嘅庾澄慶嚟講，嘉穎小兒科啦！事關咁啱今日哈林都傳出喜訊，老婆張嘉欣再為佢誕下一子。勁？未算，翻查資料，原來哈林喺上年6月先做完爸爸，老婆生咗囡囡「哈蜜瓜」，話咁快就成功兩年抱兩，絕對係有心有力嘅典範，難怪唔少網民紛紛向哈林跪求雄風秘密：「點解可以咁厲害？佢到底有乜嘢保健心得？」雖然哈林57歲再做老竇係好厲害，但原來對比賭王何鴻燊，佢都要彈開，事關當年細女何超欣出世個陣，賭王已經78歲，問大家服未？