《兄弟》播出至今外界評價麻麻，網民更力數多宗罪，當中江嘉敏與伍允龍的演出更成為炮灰，被彈演技造作、表情生硬，一見到佢哋就想熄電視，但好彩又唔係個個演員都咁大鑊嘅，劇中飾演拳手的劉穎鏇，就是少數獲網民熱捧的幸運兒，唔好以為佢單靠個樣所以受歡迎呀，實情佢為咗呢個拳手角色，事先接受半年泰拳特訓，去到真正拍攝，劉穎鏇為求效果逼真，更要求對手唔好借位，硬橋硬馬真打，毫不馬虎。搏成咁，難怪睇到唔少網民心都痛，佢哋仲話TVB應該以劉穎鏇為榜樣，做嘢唔好再是是旦旦喇！
劉穎鏇學拳半年 要求真打毫不錫身
劉穎鏇於《兄弟》中飾演豬販陳來（曾偉權飾演）女兒陳鈴，由於熱愛打拳所以放棄到海外留學，寧願做女拳手，一直以父親豬檔的真豬屍體做沙包不斷進行訓練，其後更參與由王浩信舉辦的女拳王大賽，跟王浩信死對頭萬祺（秦煌飾演）的保鑣李松蔓（原名李天縱）於擂台上展開生死鬥。由於《兄弟》是劉穎鏇的處女作，加上要飾演拳手對動作與演技等要求都十分高，為求做到最好，劉穎鏇特意學習泰拳，訓身演出。多得這半年特訓，令她在拍攝期間一舉手一投足，都展現出專業拳手的架勢，絕對似模似樣。咁都未算，佢仲拒絕借位，同對手李松蔓講：「妳要堅打我！」，實行用生命力硬接。
演活運動員辛酸 觀眾讚首次拍劇演技超班
唔止打得有板有眼，其演技更成功嚇大家一跳，當佢打完第二round之後不慎觸傷腰患，走向繩角時痛到表情扭曲，喊住講一句：「好痛啊⋯⋯」逼真到令唔少網民都以為佢真係受咗傷，紛紛留話言隔著螢幕都感覺到她有幾痛、幾辛苦。而最終劉穎鏇要退下火線，她亦從眼神中演繹出受傷被迫落場那種心痛、那種絕望的感覺，道出運動員的辛酸。
對於劉穎鏇的表現，有網民就話：「因為您先睇《兄弟》」、「睇得我們很投入、很感人，多謝你的付出為我們帶來一齣好戲」、「佢第一次拍劇效果出嚟好有驚喜，啲演技逼真到，無可能估到佢係初哥」、「由唔識學到識仲要打出嚟似模似樣，真心讚」睇見大家咁支持自己，劉穎鏇就顯得非常謙虛：「永不放棄你自己嘅夢想！無論個結果係點，最重要係可以話俾自己聽你已經盡咗自己所有嘅能力！！」