今年TVB台慶破天荒同時頒發星馬視帝，點知賽前呼聲極高，不少藝人都視他為大熱的馬國明，最終竟敗於袁偉豪之手，惹來大批網民炮轟造馬。其實又難怪大家如此激動，事關馬明入行接近二十年，論資排輩跟早已離巢的林峯、吳卓羲同級，但當連後輩王浩信等都早嘗視帝滋味的同時，馬明至今都只得個「等」字，難怪不少人都很擔心下月舉行的TVB頒獎禮，馬明會再食白果，然而根據各方面的資料顯示，馬明有三大致命傷，論奪獎機會，陳展鵬、馬德鐘與袁偉豪都比他高！
1. 把口唔夠陳展鵬
做藝人實力雖然重要，但講「關係」同樣係成功不二法門，雖然馬國明是TVB出名的貼地男神，不過他一向有「佛系藝人」之稱，不玩埋堆、不擦高層鞋，而台慶各大獎項，一直被視為各大馬房的實力指標，無泊碼頭的馬明，又點會有高層幫手爭獎？相比另一視帝大熱陳展鵬把口，馬明最少輸幾班，經常向TVB賣口乖的他曾豪言：「最好簽到我退休，起碼簽十年以上！」當年更是高層曾勵珍簽他加入TVB，故有指珍姐多番向各大監製推薦他，令陳展鵬創下於短短一年半內連續五套劇擔正做主角的紀錄，其後更憑《城寨英雄》奪得視帝，雖然他今年主演的《天命》創下收視新低，但他之前的婚禮就安排TVB直播，雖知道當年萬梓良、呂良偉結婚都試過由TVB直播，結果竟然離婚收場，陳展鵬咁勇敢，難怪唔少網民都估視帝非佢幕屬。
2. 劇集氣勢唔夠馬德鐘
既然唔識討好，咁就唯有靠實力啦！不過翻查資料，舊年馬明主演的《降魔的》，收視口碑都贏晒，但最終都要輸俾《踩過界》的王浩信。嚟到今年雖然馬明套《宮心計2深宮計》平均收視達28.6點，但就遇上平均收視達29.3點、馬德鐘的《跳躍生命線》，馬神於劇中飾演的救護員「在哥」唔止救急扶危，處處展現英勇一面，而當面對太太被車撞死後，馬神所演繹出的多層次心痛，更睇到觀眾喊埋一份。論演技、鬥人氣以至劇集聲勢，馬明都及唔上馬神。
3. 冧莊定律唔夠袁偉豪
講關係，輸！鬥劇集，又輸！估唔到睇往績數據，馬明都唔樂觀，事關近年星馬視帝，一直被視為TVB視帝的前哨戰，能夠奪得星馬視帝，之後贏面都大好多，好似鄭嘉穎同陳展鵬，就分別憑《怒火街頭》與《城寨英雄》成為三料視帝，所以今次袁偉豪憑《棟仁的時光》率先跑出，即時變成TVB視帝熱門。
年年陪跑 網民抱不平
馬國明明明努力工作毫無怨言，惜年年陪跑與TVB視帝獎項擦身而過，因為冇好劇集助上位、不懂擦鞋、失落星馬視帝，有可能連今年都要失望而回。事實上馬國明入行足足有二十年，早於1999年入行，並畢業於TVB第14期藝員訓練班，由行行企企的茄哩啡直到《衝上雲霄》與林峯等人被捧為「S4」開始受到重視。後來馬國明在《律政新人王II》首度擔任男一，去到2012年憑《On Call 36小時》奠定一線小生之位，不但得到觀眾的喜愛及認同，亦得到同行的幕前幕後所肯定。
儘管不少網民為馬國明感到不值：「其實佢《降魔的》應該贏，可惜比TVB山頭主義犧牲咗視帝寶座， 觀眾是雪亮嘅，就算無線唔給予肯定，民間投票都節節領先就知佢實至名歸」、「馬明係最捱得的好演員，有實力、有顏值、有品，或者今年冇咩代表作，但肯定已經係視帝級人馬！」，又封他為「民間視帝」。但他本人對明顯獎項沒野心，入行後一直用淡然態度面對：「人人心水都唔同，今年攞唔到咪下年囉。」去到今年似乎早知自己三大死因，馬國明早就打定輸數：「想要錢多啲，希望公司聽到，錢實際啲。今年都冇劇出，《宮心計2深宮計》都唔知係主角定配角，不過冇失望，可唔可以申請頒獎禮唔返，出去搵錢，冇獎品梗係要獎金，我嘅目標好清晰。」；至於女朋友黃心穎亦回應：「演技唔係用獎項去衡量。」