「雄姐」張彥博於《跳躍生命線》殉職一幕，不少觀眾為之動容，更令張彥博人氣急升，但原來他不單做戲叻，連唱歌玩樂器都有一手，更於TVB台慶當晚表演打鼓，令人眼前一亮。其實張彥博在加入TVB之前曾組樂隊「赤子」，可惜其後被逼解散。希望再踏舞台，多年來一直是張彥博的心願，而今日他終於夢想成真，舉行演唱會記招，宣布於下月9日在九展Star Hall開騷，張彥博更即場自彈自唱，小編喺現場聽live，絕對係貨真價實架！
咁難得達成夢想，張彥博亦顯得好感觸：「第一次接開演唱會嘅電話，開心到好似結婚咁，覺得自己發緊夢，記得20年前啱啱學識自彈自唱，當日嘅商場舞台只有3個位，依家台下可以企到3000人。自己喺音樂路上浮浮沉沉，堅持到呢一刻先叫成功，記得阿爸教過我，唔好同人比，我可以講今日嘅張彥博已經贏咗琴日嘅張彥博。」佢又好多謝《跳躍生命線》一班好兄弟：「第一個話嚟支持嘅係馬神，佢仲問：『有咩要幫手？出聲呀！』估唔到一個前輩會咁主動幫我，佢有好多idea同我傾，好開心喺音樂上可以再同佢合作。而『跳躍F4』幾位兄弟亦一早向公司拎晒假嚟捧場。」張彥博又透露滕麗名、歐陽震華等《一屋老友記》的好友都會來支持，他更特別感謝蔣志光：「佢係第一個同我講可以繼續唱歌嘅人，《圓缺》呢首歌係佢鼓勵我先做到出嚟。」有咁多人雪中送炭，足證張彥博人緣有幾好。