期間限定創新中西美食 萬麗海景歎「干邑配中菜」

黛安上星期應《晴報》專欄作家Cecilia邀請，同一班傳媒好友及專欄作家，一齊去香港萬麗海景酒店滿福樓，一嘗期間限定嘅新菜「干邑中菜配對」，結果一試難忘。

聽Cecilia講，舊年馬爹利同滿福樓推出干邑配對中菜期間限定Pairing Menu，叫好又叫座。今年就再接再厲，推出美酒佳餚配對，用美食配搭3款芳郁醇厚嘅法國著名干邑名莊馬爹利干邑，包括馬爹利藍帶、藍帶傲創同X.O.，再度帶來中西合璧嘅美食盛宴！

當晚有《晴報》社長麥華章，同一眾《晴報》專欄作家查小欣、項明生、胡孟青、鄧達智，個個都大讚菜式有創意之餘，仲話同每款馬爹利都好夾，唔會搶去食物嘅鮮味，更加令每道菜更加出色。

打頭陣嘅係「鎮店之寶」馬爹利蜜汁烤叉燒，用口感鬆化嘅脢頭肉，再用特製醬料，融合蜜糖同馬爹利名仕干邑，不斷腌製同燒烤，入口就吃到陣陣酒香味，再配上一杯果香味濃嘅馬爹利X.O.，真係好食到停唔到口。之後仲有馬爹利干邑煎大蝦配馬爹利藍帶干邑、清香汁烤法國鵪鶉腿配馬爹利藍帶傲創，同椒鹽多寶魚配馬爹利藍帶。

黛安最鍾意馬爹利干邑煎大蝦配馬爹利藍帶干邑，醬汁用咗豉油王汁，上菜前再灒上干邑令酒精揮發，令鮮甜嘅蝦肉保留酒香，再配一口馬爹利藍帶，烤杏仁、乾梅、蘋果、拖肥同橡木等香氣，伴以蝦嘅鮮甜，簡直將食物昇華到另一境界。最後仲加單，來咗個原籠荷葉污糟雞，甜品係煎鮮奶同蛋散，齒頰留香，為今次嘅聚會畫上完美句號。

Cecilia話，今次係11月期間限定，想食嘅話就要快點去訂位啦！