馬國明向來都是TVB出名的貼地男神，原因是他夠哂麻甩、草根，不但直認睇AV、鍾意昅女，又透露自己最愛上高登討論區，不過近日佢就走咗去玩新浪微博，但由於未獲微博「Ｖ字」認證，證明佢真係馬國明，所以佢專登喺每張相都畫咗個「Ｖ」，啲相一出即時震撼整個高登，大批網民讚佢嘅「毒Ｌ」指數已經爆晒燈，封佢做高登最毒男神。
手畫微博認證徽章勁可愛
有「佛系藝人」之稱的馬國明之前一直無玩社交平台，不過近日佢終於豁出去，進軍內地新浪微博，你知啦，由於內地假貨特別多，所以新浪推行認證徽章制度，如果係名人明星就會於其名字後加上橙色字母「V」圖示，不過可能由於時間關係，馬明暫時就仲未拎到呢個「V」。
好彩馬明靈機一觸，自製一個「V」字手勢，希望滿足自己小小慾望。誰知惹來粉絲嘲笑他不知道真正微博認證徽章的樣子，於是馬明決定每次上載相片前都特意P圖，手畫微博橙字紅底的「V」字，證明自己夠晒貼地：「有說要右下邊又說要黃V⋯⋯好啦好啦俾你地啦⋯⋯希望大家又笑下啦⋯⋯」，認真搞笑又親民，難怪就連出名要求高的高登巴打，都對佢今次嘅「毒Ｌ」行徑讚不絕口，唔少人仲話喺最毒男神面前，再毒都要甘拜下風。
▼大家有沒有發現這幅圖有甚麼端倪？就是馬國明手中的香煙原來也是他親自度位畫上去！粉絲見到之後都忍唔住笑出聲：「估唔到44歲嘅大叔會做呢啲嘢」、「毒L到畫左支煙仔比自己」
真性情兼天然呆 穩站高登男神之位
其實馬國明一向不怕破壞藝人完美形象，他曾經在林敏驄facebook一條短片中爆粗：「26、7點（收視）都好X高啦！」，當時網民大讚馬國明沒有明星架子：「講野語氣似一個真實世界嘅人！」面對大家的錯愛，馬明亦不毫不掩飾自己真性情﹕「電腦對我嚟講，只係用嚟上網睇新聞，睇波同埋上鹹網！我咁大個人同你講冇上過鹹網，你都唔信啦。如果我話自己都仲係處男、好純情，咁仲核突！我只係做返一個正常人會做嘅事。」有關言論一出，有關馬國明睇AV的帖文，在短短兩天內於高登衝破二千個正評，不但男網民表示敬佩：「敢做敢認嘅真男人！」，連女網民都瞬間視馬國明為最佳男朋友。
除了真性情贏得網民支持，馬國明亦很留意網民對他的評價，更因為天然呆事件被發現他常常上高登。事源2012年《萬千星輝頒獎典禮》與2013年的《萬千星輝賀台慶》中，在宣布賽果後，馬國明均出現驚呆樣子，兩次天然呆O嘴一刻剛好都被鏡頭補捉到，網民瞬即改圖，為他配上樹葉一塊及粗口「唔X係掛」。其後馬國明被取笑問道會否再次O嘴發呆，他竟回答：「我唔想再見到自己咬住塊葉！」證明原來他一直都有上高登留意有關自己的評論，才會發現被改圖，最好笑是有網民認為馬明上高登是為了睇AV找seed，只是恰巧看到自己的改圖而已。
而馬國明多年來更穩站高登首席男神寶座，包括2011年香港高登網絡紅人選舉中獲得「最受歡迎網絡男神獎」；2012年第一屆高登男神總選(香港區)選舉中，馬國明以總分1600力壓擁有1364分的「陰謀情人」鄭子誠，以及擁有956分的「棟篤笑始祖」黃子華再度奪冠。雖然2014年舉行的第二屆高登男神總選，馬明屈居黃子華之下，不過仍奪得亞軍。雖然近年高登無再搞男神選舉，不過單睇今次Ｖ圖嘅反應，就知馬明依然是高登寵兒。