飽經情傷的農夫成員鄭詩君（C君）最近宣布將於明年迎娶「港台之花」黃天頤，佢仲表明好想做爸爸！雖然對普通人嚟講，只要搵到另一半，結婚生仔係自然不過之事，但對患上重型地中海貧血症、需要終生每月輸血的C君來說，絕非易事，事關呢個病可能遺傳下一代，令他慘遭前度悔婚，如今C君終於守得雲開見月明，找到真正珍惜他的伴侶，願意跟他生小朋友，實在可喜可賀！
明年結婚生仔 無懼遺傳下一代
自從四年前C君與港台主持女友黃天頤拍拖後，二人瞬即發展至同居階段，不時被拍到手拖手行街街，C君又成日帶黃天頤出席朋友聚會，希望她融入自己的朋友圈，感情好到打風都打唔甩。而黃天頤更加從無嫌棄C君患上重型地中海貧血症，C君透露彼此已達成造人共識：「我有地中海貧血，有四分一機會下一代都會有呢個病，但係我又唔驚，同女朋友傾過佢接受到咪得囉！我好夠薑生，我細細個病到依家，照顧佢咪最適合不過。我會同佢講，定啲嚟，冇嘢嘅，你睇下爸爸都搞得掂自己啦！」
正所謂久病床前無孝子，C君能覓得如此包容自己的另一半絕非易事，事關他曾有過不幸的悔婚經歷。2010年他成功向拍拖六年的女友Gloria求婚，豪花十幾萬買求婚戒指、訂酒席，就在臨門一腳之際，但有傳Gloria因擔心將來小孩會遺傳重型地中海貧血症，故選擇悔婚，甚至搭上C君的好朋友。此事令被拋棄的C君陷入人生低潮，於facebook發文：「舊愛早已放下並前行，且毫無顧忌地與自己的好友走在一起，他哭了很久很久，崩潰了」，字裡行間看得出前女友的背叛對他非常痛苦。
父母離異兼患地中海貧血 性格樂天努力求存
其實C君的傷痛又豈止是愛情吖！他於單親家庭長大，父母於五歲離異，他們有地中海貧血病源，未有檢查自己有沒有遺傳基因，所以C君從出世時已患有重型地中海貧血症，注定終生必須定期到醫院輸血續命。可是生母沒有理會C君的病情，更加組織另一個家庭，母子從此再無聯絡：「即使走到街上遇到她都認唔出，但我對阿媽冇憎恨嘅感覺，因為太細個唔識得憎，完全唔記得有呢個人。」；至於父親由於長期在大陸工作，沒時間照顧他，其後更不幸患上胃癌英年早逝，所以C君自小由嫲嫲養大：「我哋一家人好好㗎，我唔介意養起頭家！自出娘胎我就同屋企人住喺400呎嘅快樂屋，雖然係擠迫戶，不過日日都好熱鬧，其實好溫馨。」
雖然C君樂天知命，一路走來很堅強、努力：「做嘢時間唔穩定，安排輸血會比較彈性，如果情況許可唔使4星期就去輸血。」，不過C君十四歲曾經在醫院接受輸血的訪問，講到當年因為重型地中海貧血呢個病，人哋去玩，佢就去醫院都顯得好無奈：「平時要嚟配血，唔配血你冇血輸，咁放學時走去配血，人哋放學時去打波，我要去配血，幾煩，不過唔係幾辛苦，唔返嚟輸血會死，梗係返嚟輸血啦！」
縱然生於破碎家庭兼身患重病，但C君依然能與黃天頤組織家庭，編寫幸福美滿的人生新一頁，C君的故事告訴我們每一個人，只要有夢想、有重要的人就不會覺得孤單。
[根據地中海貧血兒童基金資料顯示，地中海貧血症要長期輸血，可能因此出現併發症。過量鐵質的積聚又會對多個器官造成破壞，如心臟、肝臟、胰臟和各個內分泌器官。病者或會出現心臟衰竭、肝硬化、肝功能衰退、糖尿以及因為多種內分泌失調而變得身材矮小和發育不全等等。另外輸血時又會引起不良反應，如發熱、發冷和出紅疹等。較嚴重的反應如急性溶血、氣管收縮和血壓下降。除鐵藥更加會影響視力、聽覺和骨骼生長。]