2016年港姐亞軍、年僅21歲的劉穎鏇，唔止可愛美麗，仲精通粵語、普通話、英語同西班牙語，四種語言，絕對內外兼備，難怪成為TVB力捧對象，最近播出的台慶劇《兄弟》，劉穎鏇更是女主角之一，絕對有力跑出。不過就在上位之際，近日卻驚爆她偷偷戀上港男胡㻗，話說當日劉穎鏇去完《兄弟》飯局後，胡㻗揸車接佢去西貢談心，有指佢哋仲喺車上摸黑親熱20分鐘，不過當記者上前採訪，佢哋即火速開車走人，駛回女方於將軍澳的寓所，到達後，記者追問劉穎鏇是否與胡㻗拍拖，佢只係話：「畀啲私人空間我哋，Sorry，唔好意思。」其後劉穎鏇再接受訪問更一度激動落淚，強調與胡㻗只是好朋友，並非戀人。
而自呢段疑似戀情曝光後，惹嚟唔少劉穎鏇粉絲不滿，事關佢哋覺得胡㻗襯偶像唔起，以劉穎鏇條件，絕對可以搵更好條件嘅男友，「點會揀佢？我連胡㻗個名點讀都唔識，只係知佢選過港男，係羅天宇細佬，但點解佢哋唔同姓嘅？」「佢唔止選過港男，仲選過亞洲先生，當年佢著住底褲通街走。」
一心加入娛樂圈
其實胡㻗可算生於演藝世家，爸爸胡越山當年係無綫「銀河十星」，而羅天宇就係佢同母異父嘅哥哥，胡㻗在耳濡目染下一心加入娛樂圈，早於2012年就以別名「羅駿宇」參加亞洲先生，當年佢哋仲成班人著住底褲遊中環，成為一時佳話。及至2016年他參加香港先生，可惜三甲不入，不過就獲簽約做藝人，由於當年無綫將港姐港男合併一齊搞，造就劉穎鏇與胡㻗的邂逅機會，不過相比女方的星途，胡㻗就慘淡得多，雖然拍過唔少劇，仲做過《跳躍生命線》，但大部份角色連名都無，估唔到今次因為同劉穎鏇嘅戀情而成為娛樂頭條。
兩人戀情原來有跡可尋，經常一齊出席朋友聚會。