話說上世記90年代仲係港產片嘅黃金年代，未北上賺人仔嘅王晶睇中咗金庸嘅《倚天屠龍記》，於是佢身兼編劇、導演，仲請嚟洪金寶、李連杰、張敏、邱淑貞與黎姿等多位重量級人馬，拍咗套《倚天屠龍記之魔教教主》，套戲結尾張敏仲話要去救六大派，為續集留伏線，點知電影喺1993年上畫，票房只得約一千萬，蝕到入肉，令續集《倚天屠龍記之陰陽聖火令》胎死腹中，不過隨著金庸離世，令內地又再掀起金庸熱，有指晶哥睇準時機決定開拍續集，不過選角問題就好頭痛，事關男主角李連杰身價最少億億聲，而女主角張敏更加早已淡出幕前，好彩咁小事又點會難倒晶哥吖，據最新消息指，劇組決定起用年僅18歲的內地小鮮肉吳磊做張無忌，又請來鄭少秋做張三豐，仲話胡歌都會參演，不過角色尚未落實。
雖然吳磊外型不俗，加上童星出身，演技早獲外界認同，不過論卡士，實在同李連杰差好遠，難怪消息一出，唔少網民都喊驚，擔心再一次破壞經典：「根本金庸嘅小說好難拍成電影，李連杰都唔掂，吳磊死硬，好心佢放過金庸。」、「晶哥肯定又係拍畀大陸人睇，只要唔喺香港上，咪當時運高」睇見網民咁嘅反應，睇嚟晶哥開拍前都係停一停，諗一諗好喎！
新版張無忌吳磊