陳寶珠拍過《六指琴魔》、林青霞拍過《六指琴魔》、吳奇隆都拍過《六指琴魔》，就算你無睇過，都一定聽過佢個大名，改篇自倪匡同名經典小說的《六指琴魔》，可以話係香港人嘅集體回憶，不過最近就竟然變成災難。
事關北上掘金多年嘅王晶，繼早前炮製余文樂版《冒險王衛斯理》，被炮轟將衛斯理改到不倫不類，睇到大家咬牙切齒之後，晶哥又有新搞作，就係再次身兼總監製、總導演兼編劇，嘔心瀝血拍攝《新六指琴魔》，仲請嚟陳浩民做東方白，在小說中東方白只屬配角，但今次晶哥再次發揮無限創意，將東方白變成主角，而近日流出的劇照中，陳浩民唔止人如其名成身白色，更有一頭超級長髮，絕對震撼力十足，令唔少網民睇完之後都驚呼點解東方不敗走去拍《六指琴魔》，「之前聽話係全新劇情都知大鑊，睇完劇照仲慘，點解無端端多咗個東方不敗？」「既然王大導要發揮創意，點解仲用《六指琴魔》四隻字，求你唔好毀咗經典！」
馬賽飾演水玲瓏
今次套劇既然有個「新」字，當然保證令大家驚喜萬分啦！《新六指琴魔》將故事重新編寫，增加情節、增加人物，更改變年代，講述事隔多年後，琴魔突然重出江湖報仇，俠一代與俠二代只好聯手抗敵，再次勾劃出一幕又一幕恩怨情仇，晶哥更豪言之所以有咁嘅構思，是因為要與時並進，跟住潮流走喎！故該劇起用大量新人，不過亦有少量熟悉面孔，除了陳浩民，還有在港失蹤多時的馬賽，她於劇中飾演水玲瓏，希望向打女之路進發，仲因為拍打戲受傷添呀：「常常在武林打架，女俠也會受傷。原來坐輪椅那麼舒服。」認真陰公豬。