到底邊個先係李小龍接班人？呢個課題講咗幾十年都未有答案，不過日本竟然出現一位Mini李小龍今井竜惺，雖然佢只係得8歲，但已經練出一身嚇人Body，胸肌、腹肌乜都齊，佢嘅「李三腳」仲一樣踢到高過頭，你可能會驚訝，只得8歲人仔，點可能有呢身誇張過大人嘅肌肉，原來今井竜惺的祖父同阿爸都是李小龍鐵粉，日日喺屋企播龍哥嘅戲，耳濡目染下令竜惺亦變成李小龍粉絲，4歲已識得跟住電視學龍哥耍雙節棍，竜惺解釋：「記得我一歲已識睇佢嘅電影，最鍾意係《猛龍過江》，仲會模仿佢嘅動作，不過最初我犯咗唔少錯，唔識掌握時間，有時太快、有時太慢，不過依家我已經可以完全模仿佢喺電影中嘅動作。」
正所謂成功需苦幹，要成為Mini李小龍，竜惺由4歲開始已接受有系統的訓練，每日最少花四小時進行跑步、倒立、單手掌上壓、姆指掌上壓與引體上升等，日子有功終於成就呢身嚇人Body。
甄子丹 元彪讚不絕口
而最近竜惺更有機會與兩大打得之人甄子丹與元彪碰面，對於呢位睇得又打得的Mini李小龍，兩人同樣讚不絕口，丹爺謙稱自己8歲個陣，唔係竜惺對手，而元彪就話：「我覺得佢將來一定會成才，成為武術功夫界嘅日本接班人。」不過竜惺嘅呢身肌肉就引嚟唔少網民質疑：「係咪食咗藥架？8歲點可能操到咁激，小心影響青春期發育喎！」「完全違反自然定律，我係佢父母就會驚有後遺症囉」