馬德鐘回歸TVB拍台慶劇《跳躍生命線》，播出以來贏盡收視口碑，馬神於劇中飾演的麥sir麥在田，雖然飽受喪妻之痛，但仍繼續以最專業的態度拯救生命，感動萬千觀眾，難怪被視為今年視帝大熱，不過馬神就好謙咁話：「大家都係咁講，但我經歷咗咁多年，有就錦上添花，無就安守本份，可能有人認為我做得好，但亦有人會話唔好，其實套劇好先係基礎。初時我無諗過會有咁好口碑，我一直只係盡力拍，無諗過收視點、係咪有獎。」
笑談整容傳聞
而今日馬神現身電台做宣傳，穿上短袖裇衫的他，無論個樣同身形都好似有啲唔同咗，明明已經50歲嘅佢，望落竟然似三字頭，難怪佢話身邊朋友都以為佢整容：「有人問我係咪有病，有人話我整容，因為無咗水腫，個雙眼皮深咗，其實呢個好難，整容醫生都整唔到。」馬神又透露之所以大變身，全因減咗20磅：「依家我嘅狀態同30歲個陣一樣，但未到最fit，我嘅減肥方法係唔食肉，改為食豆同種子，我已經Keep咗八個月，一直無病過，皮膚同呼吸道過敏嘅問題都好咗。」
馬神嘅回春look一出，即時成為網上熱話，仲有唔少人拎馬神同劇中飾演佢下屬、今年30歲嘅何廣沛比，「馬神呢啲咪寶刀未老囉！睇落仲young過何廣沛，新一代個班真係好難同馬神比。」不過亦有網民質疑減肥減到成個樣唔同咗：「真係咁神奇，減肥減到變成咁？我就唔多信囉！」