《跳躍生命線》現正播得如火如荼,除了正直不阿的馬德鐘、熱血衝動的何廣沛、愛子心切的李成昌搶鏡之外,出名有「陰謀」的惡教官鄭子誠同樣是一大亮點。劇中他負責在學堂教導學員,務求在二十六個星期之後訓練出一批優秀救護員。由於鄭子誠作風嚴厲苛刻,期間又不時大聲訓斥學員,表面好似不近人情,但就獲真正的救護員大讚演繹到位,與真實情況一模一樣,令他們想起以前受訓的艱苦日子。而除了角色夠搶,鄭子誠的招牌磁性聲音亦是一絕,於劇集結尾上演的深情獨白,成功觸動不少人心靈。
鄭子誠做鐵面教官夠寫實 救護員大讚好有回憶
劇中鄭子誠這位惡教官的確令不少學員吃盡苦頭,當何廣沛等學員初入學堂時甚麼都不懂,但鄭子誠已強逼他們無論是打招呼做的手勢、步操的姿勢,以至制服問題等,都有嚴格要求,一旦做不好,唔止即場鬧爆,仲要罰做一百下掌上壓。咁都未算,鄭子誠對學員日生活亦有超高要求,如去到宿舍又會檢查儲物櫃、洗手間的整潔,有一次去宿舍進行檢查,發現有學員不慎露出底褲邊,立即懲罰所有學員跑操場。每天上午何廣沛他們要受訓、練步操;夜晚要熨衫、磨鞋面、溫書,過份壓迫的時間表與嚴厲的教官往往令他們吃不消。又有一次走火警,何廣沛因當時瞓緊覺趕到地下集合,一時忘記戴肩章,就被鄭子誠黑面責罵:「一味心存僥倖,無知、自私!」、「做得唔夠好唔係藉口」。而去到快畢業的日子,何廣沛步操不時犯錯,鄭子誠痛罵:「點解你哋仲未操得齊,你哋就嚟passing out,我唔想我教嗰班喺畢業禮上面出醜!」
雖然他表面無情冷血,處處針對粗心大意的何廣沛,實際上只是苦心婆心、口硬心軟的人。見到同學寧願犧牲睡眠時間都要陪何廣沛練習,鄭子誠非常安慰,即時換衫幫手。他要求高,其係想大家順利畢業,令人感動到毛管戙。難怪有真正救護員大讚鄭子誠完全反映出現實:「我哋擦鞋真係圍埋一齊,要擦到鏡咁見到個樣先得。」、「好有回憶啊!阿sir當初就係咁鬧我哋,所有嘢都一模一樣」。
溫柔靚聲講獨白好感人 讓觀眾沉醉當中
鄭子誠於劇中的表現固然抵讚,估唔到去到結尾的深情獨白,亦令人感觸萬分:「人總會有一刻你以為失去所有嘅同時,竟然會係前所未有嘅收獲。乜嘢係可以捨棄,乜嘢係不能放手,迷惘過後緊隨嘅會係一顆澄明嘅心。傷痛過後,換嚟嘅會係更堅定嘅人生。當你以為會失去一個人,到頭嚟竟然會得著一整隊人,望住佢地心意一致,目光堅定不移......」透過這段心聲,鄭子誠抒發見到大家因為想保護何廣沛免被踢走而變得團結一致的安慰,使觀眾聽完更加明白角色感受,沉醉當中。