要數80年代娛樂圈女神，張曼玉肯定上榜，而且佢唔止得個樣，仲贏過柏林、康城、金像、金馬影后等多個殊榮，堪稱美貌與演技並重，可惜相對輝煌事業， Maggie的情路明顯坎坷得多，曾經與梁朝偉傳緋聞，但偉仔最終情定劉嘉玲，因而傳出與嘉玲不和的傳聞，雖然Maggie於1998年與法國導演阿薩耶斯結婚，但此後卻屢傳婚變消息，及至2002年兩人終於發聲明宣布離婚，其後Maggie雖然都有拍拖，先後與德國建築師Ole Scheeren及混血型男Adrian譜出姊弟戀，可惜都未能開花結果。
而飽受情傷的Maggie，近年更絕少亮相幕前，選擇周遊列國享受生活，繼今年5月有人於香港夜店偶遇Maggie後，近日又有網民於英國野生捕獲她，只見54歲的Maggie無懼素顏上陣，整體都keep得算唔錯，不過眼角的魚尾紋就好鬼馬走晒出嚟，令唔少網民都好戥佢心痛：「曼玉係咪受得太多情傷，搞到殘咗咁多，魚尾紋好顯眼，點算呀？」「睇嚟Maggie冇咗愛情滋潤真係好dry，希望佢快啲搵到真命天子啦！」不過亦有網民認為Maggie已經年過半百，有幾條皺紋好平常，唔通要狂P圖先開心咩，仲希望Maggie快啲復出影壇，繼續拍多啲好戲畀大家睇呀！