黛安
黛安

零食物語首間「無人商店」 下月登場

發佈時間: 2018/08/29

零食物語首間「無人商店」 下月登場

近年「無人商店」喺各地興起,黛安最近收到風,知道零食物語會喺下個月開第一間無人商店,名為「無人零食物語」,以後買零食就更加方便啦!

黛安知道無人商店早在2015年就喺內地冒起,好似阿里巴巴嘅超市「淘咖啡」、京東商城嘅「無人超市」等等,熱潮之後仲擴展到全球,連亞馬遜旗下第一間無人超市Amazon Go都喺美國開張,仲有台灣7-ELEVEN都試推無人商店,聽講買一杯咖啡埋單只需要15秒,非常方便。

四洲集團噚日就宣布,旗下嘅零食物語會喺下個月,在旺角家樂坊商場開設集團第一間無人商店,店舖入面有超過100款唔同種類嘅食品。以後想買零食就話咁易啦,落街拍一拍電子錢包就可以埋單,認真方便呀!

用WeChat Pay付款

四洲集團主席戴德豐同黛安講,無人商店同電子支付已經成為零售業嘅大趨勢,公司今次同內地知名嘅科技公司合作,希望為消費者帶來新體驗之餘,亦可以推動業務發展,相信一定會顛覆香港嘅零售潮流。

黛安聽公關姊妹講,無人商店會喺下個月5號開幕,店內係透過射頻識別(RFID)技術,配合顧客嘅WeChat Pay就可以完成成個流程,中間唔需要任何人手,購物非常便捷,黛安到時都會試買!

撰文: 黛安 消息特靈八卦公關
欄名: 八卦名利場